:

ഇടുക്കി നഴ്സിംഗ് കോളേജ് വിദ്യാർത്ഥികൾക്ക് താമസസൗകര്യം ഒരുക്കാൻ ജില്ലാ കളക്ടർ ഡോ. ദിനേശൻ ചെറുവാട്ടിന്റെ അദ്ധ്യക്ഷതയിൽ ചേർന്ന യോഗത്തിൽ തീരുമാനം. മെഡിക്കൽ കോളേജ്, നഴ്സിംഗ് കോളേജ് അധികൃതർ, വിദ്യാർത്ഥി പ്രതിനിധികൾ എന്നിവരുമായി നടത്തിയ ചർച്ചയിലാണ് തീരുമാനം.

പൈനാവിലെ വർക്കിംഗ് വിമൻസ് ഹോസ്റ്റലിൽ 32 മുറികളിൽ ഒഴിഞ്ഞുകിടക്കുന്ന 16 മുറികളിൽ പെൺകുട്ടികളെ താമസിപ്പിക്കും. ഒരു മുറിയിൽ 4 വിദ്യാർത്ഥികൾ വീതം 64 വിദ്യാർത്ഥികളെ ഇവിടെ താമസിപ്പിക്കാനാകും. മെഡിക്കൽ കോളേജിലെ എംബിബിഎസ് വിദ്യാർഥികളുടെ ഹോസ്റ്റലിൽ 18 മുറികൾ ഒഴിവുണ്ട്. ഒരു മുറിയിൽ നാലു കുട്ടികൾ വീതം 72 വിദ്യാർത്ഥികളെ ഈ മുറികളിൽ താമസിപ്പിക്കാനാകും. നിലവിൽ മറ്റ് സ്ഥലങ്ങളിലായി താമസിക്കുന്ന മുഴുവൻ പെൺകുട്ടികളെയും ഈ രണ്ടു സ്ഥലങ്ങളിലായി താമസിപ്പിക്കും.

ബാക്കിയുള്ള 12 ആൺകുട്ടികളുടെ താമസസൗകര്യവുമായി ബന്ധപ്പെട്ട്, മെഡിക്കൽ കോളേജിലെ ജീവനക്കാർ താമസിക്കുന്ന ക്വാർട്ടേഴ്സിലേക്ക് ഇവരെ മാറ്റിതാമസിപ്പിക്കാൻ യോഗത്തിൽ ധാരണയായതായി ജില്ലാ കളക്ടർ അറിയിച്ചു. മെഡിക്കൽ കോളേജിലെ എൻജിഒ ക്വാർട്ടേഴ്സിന്റെയും ഹൗസ് സർജൻസ് ക്വാർട്ടേഴ്സിന്റെയും നിർമ്മാണം ഡിസംബർ അവസാന ആഴ്ചയോടെ പൂർത്തിയാകും. ഇതിനു ശേഷമായിരിക്കും ആൺകുട്ടികളെ മെഡിക്കൽ കോളേജ് ജീവനക്കാർ നിലവിൽ താമസിക്കുന്ന ക്വാർട്ടേഴ്സിലേക്ക് മാറ്റുകയെന്നും ജില്ലാ കളക്ടർ അറിയിച്ചു.