തലശേരി: സംഗമം ജംഗ്ഷനിലെ ഹൈമാസ്റ്റ് ലൈറ്റിന്റെ ഇരുമ്പ് തൂണിൽ കർണാടക റോഡ് ട്രാൻസ്‌പോർട്ട് ബസിടിച്ച് ആറ് യാത്രക്കാർക്ക് പരിക്കേറ്റു. ജനറൽ ആശുപത്രിയിലും സമീപത്തെ മിഷൻ ആശുപത്രിയിലുമായി പരിക്കേറ്റവർ ചികിത്സതേടി. അപകടത്തിൽ ഹൈമാസ്റ്റ് ലൈറ്റിന്റെ തൂൺ ചെരിഞ്ഞ് അപകടാവസ്ഥയിലായി. വ്യാഴാഴ്ച പുലർച്ചെ മൂന്നോടെയാണ് സംഭവം.
തൃശൂരിൽ നിന്നും തലശേരിവഴി വീരാജ്‌പേട്ടയിലെ ഹാസനിലേക്ക് പോകുന്നതിനിടെയാണ് ബസ് നിയന്ത്രണം വിട്ട് ട്രാഫിക് സർക്കിളിലെ ഹൈമാസ്റ്റ് ലൈറ്റിന്റെ ഇരുമ്പ് തൂണിലിടിച്ചത്. അപകടത്തെ തുടർന്ന് ബസിന്റെ സ്റ്റിയറിംഗ് പ്രവർത്തനരഹിതമായതിനാൽ സർവിസ് നടത്താൻ കഴിഞ്ഞില്ല.
യാത്രക്കാരെ പിന്നീട് മറ്റൊരു ബസിൽ കയറ്റിവിട്ടു. രാത്രിയിൽ ഇവിടെ തെളിയുന്ന ഹൈമാസ്റ്റ് ലൈറ്റിന്റെ വെളിച്ചം അപകടം വരുന്നരീതിയിൽ പ്രതിഫലിച്ച് ഡ്രൈവർമാരുടെ കാഴ്ചയ്ക്ക് പ്രശ്നമുണ്ടാക്കുന്നതായി പരാതിയുണ്ട്. കഴിഞ്ഞ മൂന്നുമാസത്തിനകം നാലോളം വലിയ വാഹനങ്ങൾ ഇവിടെ രാത്രിയിൽ അപകടത്തിൽപ്പെട്ടിട്ടുണ്ട്.