കോട്ടയം: ഏറെ നാളത്തെ കാത്തിരിപ്പിനൊടുവിൽ കോട്ടയം - കുമരകം റോഡിലെ കോണത്താറ്റ് പുതിയ പാലം താത്കാലികമായി ഗതാഗതത്തിന് തുറന്ന് നൽകി. ഇതോടെ കുമരകത്തുകാരുടെ യാത്രാ ദുരിതത്തിനും പരിഹാരമാകും. കുമരകത്തെത്തുന്ന ടൂറിസ്റ്റു കൾക്കും സഹായകമാകും. കഴിഞ്ഞ സെപ്തംബർ 30 ന് പാലം തുറക്കുമെന്ന് പ്രഖ്യാപിച്ചിരുന്നെങ്കിലും മഴ കാരണം അപ്രോച്ച് റോഡ് പണി നീളുകയായിരുന്നു. നിർമ്മാണം പൂർണമാകാത്തതിനാൽ ഗതാഗതം ഒരു വശത്ത് കൂടെ മാത്രം നിയന്ത്രിച്ചാണ് ബസുകൾ ഉൾപ്പടെയുള്ള വാഹനങ്ങൾ പാലത്തിലൂടെ കടത്തിവിടുന്നത്. മണ്ണും മെറ്റലുമിട്ട് ഉറപ്പിച്ച ഭാഗം വാഹനം കയറിയിറങ്ങി ബലപ്പെട്ട ശേഷമായിരിക്കും ടാറിംഗ് നടത്തുക.

മന്ത്രി വി.എൻ വാസവൻ, പഞ്ചായത്ത്, പൊതുമരാമത്ത്, കിഫ്ബി പ്രതിനിധികൾ അടക്കമുള്ളവരുടെ സാന്നിധ്യത്തിലായിരുന്നു പാലം ഗതാഗതത്തിനായി തുറന്ന് നൽകിയത്. പാലത്തിന്റെ പ്രവേശന ഭാഗം റോഡ് നിരപ്പാക്കിയ ശേഷമാണ് വാഹന ഗതാഗതം ആരംഭിച്ചത്. ടാറിംഗ് അടക്കം പൂർത്തിയാക്കി ഔദ്യോഗിക ഉദ്ഘാടനം പിന്നീട് നടക്കുമെന്ന് മന്ത്രി വി.എൻ.വാസവൻ അറിയിച്ചു .

രാഷ്ട്രപതിയുടെ കുമരകം സന്ദർശനം ഈ മാസം 23 ന് നടക്കുന്നതിനാൽ പുതിയ പാലത്തിനൊപ്പം ബണ്ട് റോഡിലൂടെയും ഗതാഗതം തുടരും.