ഇടുക്കി: വിനോദസഞ്ചാരികളെ മർദ്ദിച്ച സംഭവത്തിൽ യുവാക്കൾക്കെതിരെ വധശ്രമത്തിന് കേസെടുത്തു. ഇടുക്കി മൂന്നാറിൽ വാഹനത്തിന് സൈഡ് കൊടുക്കാത്തതിന്റെ പേരിലാണ് മൂവർ സംഘം മൂന്നാറിലെത്തിയ കോളേജ് വിദ്യാർത്ഥികളെ മർദ്ദിച്ചത്.

തമിഴ്നാട്ടിൽ ഹോട്ടൽ മാനേജ്‌മെന്റ് കോഴ്‌സ് പഠിക്കുന്ന വിദ്യാർത്ഥികളുടെ സംഘം കഴിഞ്ഞ ദിവസമാണ് മൂന്നാറിലെത്തിയത്. പള്ളിവാസലിന് സമീപത്തുവച്ച് ഇവരുടെ വാഹനം മൂവർ സംഘത്തിന്റെ ഇരുചക്ര വാഹനത്തിന് സൈഡ് നൽകിയില്ലെന്ന പേരിലായിരുന്നു തർക്കം. പിന്നീടിത് മർദ്ദനത്തിൽ കലാശിക്കുകയായിരുന്നു.

ആറ്റുകാട് സ്വദേശികളായ കൗശിക്, സുരേന്ദ്രൻ, അരുൺ സൂര്യ എന്നിവർ ചേർന്നാണ് വിദ്യാർത്ഥികളെ മർദ്ദിച്ചത്. കല്ലുകൊണ്ടുള്ള ആക്രമണത്തിൽ തൃച്ചി സ്വദേശികളായ അരവിന്ദ്, ഗുണശീലൻ എന്നിവർക്ക് സാരമായി പരിക്കേറ്റു. ഇവർ ആശുപത്രിയിൽ ചികിത്സയിൽ കഴിയുകയാണ്. കോടതിയിൽ ഹാജരാക്കിയ മൂന്ന് പ്രതികളെയും റിമാൻഡ് ചെയ്തു.