ഉപ്പ് തൊട്ട് കർപ്പൂരം വരെയും ഫ്രിഡ്ജിൽ സൂക്ഷിക്കുന്ന ശീലം ഉള്ളവരാണ് നമ്മളിൽ പലരും. ഭക്ഷണം പുതുമയോടെ സൂക്ഷിക്കുന്നതിനും, കേടാകാതെ സൂക്ഷിക്കുന്നതിനും ഫ്രിഡ്ജ് ഒരു നിർണായക ഘടകമാണ്. സമയ ലാഭത്തിനായി ആഹാര സാധനങ്ങൾ നേരത്തെകൂട്ടി പാകം ചെയ്തോ അധികമായി പാകം ചെയ്തോ ഫ്രിഡ്ജിൽ സൂക്ഷിക്കുന്നവരും ഏറെയാണ്. എന്നാൽ, ഒരു കാരണവശാലും ഫ്രിഡ്ജിൽ സൂക്ഷിക്കാൻ പാടില്ലാത്ത ആഹാരവസ്തുക്കളും ഉണ്ട്. അത്തരത്തിൽ ചെയ്യുന്നത് ആരോഗ്യത്തിനുപോലും ഹാനീകരമായി ബാധിച്ചേക്കാം.

ഉരുളക്കിഴങ്ങ്

വേവിച്ചതും വറുത്തതുമായ ഉരുളക്കിഴങ്ങ് വിഭവങ്ങൾ ഫ്രിഡ്ജിൽ സൂക്ഷിച്ച് കഴിക്കാറുണ്ട്. എന്നാൽ ഇവ സാധാരണ അന്തരീക്ഷ ഊഷ്മമാവിൽ സൂക്ഷിച്ച് കഴിക്കുന്നതാണ് കൂടുതൽ നല്ലത്. തണുത്ത ഊഷ്മാവിൽ അന്നജം വളരെ വേഗത്തിൽ പഞ്ചസാരയായി മാറുന്നു. ഇത് ആരോഗ്യത്തെ ദോശകരമായി ബാധിക്കാം. കൂടാതെ ഫ്രിഡ്ജിൽ സൂക്ഷിച്ച ഉരുളക്കിഴങ്ങ് പാകം ചെയ്യുന്നതിന് കൂടുതൽ സമയവും വേണ്ടി വരുന്നു.

മുട്ട

കൂടുതൽ നാൾ കേടാകാതിരിക്കുന്നതിന് മുട്ട ഫ്രിഡ്ജിൽ സൂക്ഷിക്കുന്നത് ഗുണം ചെയ്യുന്നു. എന്നാൽ ഫ്രിഡ്ജിൽ സൂക്ഷിക്കുന്നതിലൂടെ മുട്ടയുടെ രുചി കുറയുന്നു. ഫ്രിഡ്ജിൽ സൂക്ഷിക്കുമ്പോൾ മുട്ടയുടെ വെള്ളയും മഞ്ഞയും എളുപ്പത്തിൽ കലരുന്നു. ബുൾസൈ പോലുള്ള വിഭവങ്ങൾ ഉണ്ടാക്കുമ്പോൾ ഇത് വെല്ലുവിളിയാകുന്നു.

പഴം

ഫ്രിഡ്ജിൽ സൂക്ഷിക്കുന്നത് പഴത്തിന്റെ തൊലി പെട്ടെന്ന് കറുക്കുന്നതിന് കാരണമാകുന്നു. പൂർണ്ണമായി പഴുക്കാത്ത പഴമാണെങ്കിൽ ഫ്രിഡ്ജിൽ സൂക്ഷിക്കുന്നതിലൂടെ അതിന്റെ പാകമാകൽ തടസ്സപ്പെടുന്നു. ഇത് പഴം കൂടുതൽ കട്ടിയുള്ളതായി മാറ്റുന്നതിനും മധുരം കുറയ്ക്കുന്നതിനും കാരണമാകുന്നു.

തണ്ണിമത്തൻ

ഫ്രിഡ്ജിൽ സൂക്ഷിക്കുന്നത് തണ്ണിമത്തന്റെ രുചി കുറയ്ക്കുന്നതിനും അത് വേഗത്തിൽ അഴുകുന്നതിനും കാരണമാകുന്നു. അതുപോലെ, കൂടുതൽ പാകമാകുന്ന പ്രക്രിയയെ തടസ്സപ്പെടുത്തുകയും രുചി കുറയ്ക്കുകയും ചെയ്യുന്നു. അതിനാൽ, സ്വാഭാവിക താപനിലയിൽ സൂക്ഷിക്കുന്നതാണ് തണ്ണിമത്തൻ കൂടുതൽ രുചികരമാക്കുന്നതിന് നല്ലത്.

ഉള്ളി

ഉള്ളി കൂടുതൽ ഫ്രഷ് ആയി ഇരിക്കണമെങ്കിൽ കൂടുതൽ വായു സഞ്ചാരമുള്ള സ്ഥലത്ത് സൂക്ഷിക്കണം. ഫ്രിഡ്ജിൽ സൂക്ഷിക്കുന്നത് ഉള്ളി എളുപ്പത്തിൽ അഴുകുന്നതിന് കാരണമാകുന്നു. കട്ട് ചെയ്ത ഉള്ളി ഫ്രിഡ്ജിൽ സൂക്ഷിക്കുന്നത് ഫ്രിഡ്ജിനുള്ളിലും അടുക്കളയിലും ദുർഗന്ധം വമിക്കുന്നതിന് കാരണമാകുന്നു. ഉള്ളിയും ഉരുളക്കിഴങ്ങും ഒരുമിച്ച് സൂക്ഷിക്കുന്നത് ഉള്ളി എളുപ്പത്തിൽ മുളയ്ക്കുന്നതിനും കാരണമാകുന്നു.

ചായപ്പൊടി

സൂര്യ പ്രകാശം നേരിട്ട് ഏൽക്കാത്ത വായുസഞ്ചാരമുളള ഇടങ്ങളിൽ ചായപ്പൊടി സൂക്ഷിക്കുന്നതാണ് എപ്പോഴും നല്ലത്. ഫ്രിഡ്ജിനുള്ളിൽ ചായപ്പൊടി സൂക്ഷിക്കുന്നത് മറ്റ് ഭക്ഷണ പദാർത്ഥങ്ങളുടെ രുചിയും മണവും ചായപ്പൊടിയിൽ കലരുന്നതിന് കാരണമാകുന്നു. ഇത് ചായയുടെ രുചിയെ മോസമായി ബാധിച്ചേക്കാം

തേൻ

ഫ്രിഡ്ജിൽ തേൻ സൂക്ഷിക്കുന്നത് അത് എളുപ്പത്തിൽ തരികളായി മാറുന്നതിനും കട്ടി തോന്നിപ്പിക്കുന്നതിനും കാരണമാകുന്നു. സാൻഡ്‌വിച്ചിലും മറ്റും പുരട്ടുന്നതിന് അനുയോജ്യമായ ഘടനയെ ഇല്ലാതാക്കുന്നു. തേനിന്റെ ഘടനയും രുചിയും നിലനിർത്തുന്നതിന് അത് സാധാരണ ഊഷ്മാവിൽ വച്ച് ഉപയോഗിക്കുന്നതാണ് നല്ലത്.

വെള്ളം ഉൾക്കൊള്ളുന്ന പച്ചക്കറികൾ

വെള്ളരി , മത്തൻ തുടങ്ങിയ പച്ചക്കറികൾ ഫ്രിഡ്ജിൽ സൂക്ഷിക്കുന്നത് അവ എളുപ്പത്തിൽ അഴുകുന്നതിന് കാരണമാകുന്നു. കൂടുതൽ വെള്ളം ഉൾക്കൊള്ളുന്ന പഴങ്ങളും പച്ചക്കറികളും ഫ്രിഡ്ജിൽ സൂക്ഷിക്കാതിരിക്കുന്നതാണ് നല്ലത്.