ലാൽജോസ് സംവിധാനം ചെയ്ത നീലത്താമര എന്ന ചിത്രത്തിലൂടെ മലയാളികൾക്ക് സുപരിചിതയായ നടിയാണ് അർച്ചന കവി. വിരലിൽ എണ്ണാവുന്ന സിനിമകളിൽ മാത്രം അഭിനയിച്ച നടി പിന്നീട് കരിയറിൽ നീണ്ട ഇടവേള എടുക്കുകയായിരുന്നു. എന്നാൽ അടുത്തിടെ പുറത്തിറങ്ങിയ ടൊവിനോ തോമസ് നായകനായ പുതയ ചിത്രം ഐഡന്റിറ്റിയിൽ താരം പ്രധാന വേഷത്തിൽ എത്തിയിരുന്നു. അർച്ചന കവിയുടെ വേഷം മികച്ച പ്രതികരണങ്ങളാണ് നേടിയത്.

വിവാഹ ജീവിതത്തെക്കുറിച്ചും ശേഷമുണ്ടായ ഡിവോഴ്സിനെക്കുറിച്ചും തുറന്നുസംസാരിച്ച താരമാണ് അർച്ചന. ഡിവോഴ്സിന് ശേഷം അനുഭവിച്ച ഡിപ്രഷനെക്കുറിച്ചും താരം മനസുതുറന്നിരുന്നു. കുട്ടിക്കാലം മുതൽ സുഹൃത്തായ അബീഷ് മാത്യുവിനെയായിരുന്നു താരം വിവാഹം കഴിച്ചത്. എന്നാൽ പിന്നീട് ആ ബന്ധം ഡിവോഴ്സിലേക്ക് നീങ്ങുകയായിരുന്നു. തങ്ങൾ പിരിയാനുള്ള കാരണം വ്യക്തിപരമാണെന്നും അതു പൊതുവേദിയിൽ പറയാൻ താത്പര്യമില്ലെന്നുമാണ് അർച്ചന ഇതേക്കുറിച്ച് പറഞ്ഞത്.

'എന്തോ കാരണം കൊണ്ട് ഒന്നിച്ചുള്ള ജീവിതം വർക്കൗട്ടായില്ല .എനിക്ക് കിട്ടിയത് നല്ലൊരു വിവാഹവും നല്ല ഡിവോഴ്സുമായിരുന്നു. അത് അഭിമാനത്തോടെയാണ് ഞാൻ പറയുന്നത്. പരസ്പരം പഴിചാരാനോ ചീത്ത പറയാനോ പോയിട്ടില്ല. അവൻ വേറെ കെട്ടിപോയി. നമുക്ക് ഒരു ജീവിതമല്ലേ ഉള്ളൂ. അതിനിടെ എന്തിനാണ് അനാവശ്യമായ പ്രശ്നങ്ങൾ. സമയം എല്ലാം സുഖപ്പെടുത്തും. ഇനി ഒരു വിവാഹം വേണ്ട. ഡിപ്രഷൻ സ്റ്റേജിലായിരുന്നു ഞാൻ. അതിന് ഇപ്പോഴും മരുന്ന് കഴിക്കുന്നുണ്ട്'- ഇങ്ങനെയായിരുന്നു താരം അന്ന് വിവാഹത്തെക്കുറിച്ച് പ്രതികരിച്ചത്.

എന്നാൽ ഇപ്പോഴിതാ അർച്ചന കവി പങ്കുവച്ച ഒരു ഇൻസ്റ്റഗ്രാം സ്റ്റോറി ആരാധരുടെ ഇടയിൽ ചർച്ചയായിരിക്കുകയാണ്. താൻ ഒരു പങ്കാളിയെ കണ്ടെത്തിയെന്ന് സൂചന നൽകിക്കൊണ്ടുള്ള വാചകങ്ങളാണ് അർച്ചന സ്‌റ്റോറിയിൽ കുറിച്ചത്. 'ഈ ഏറ്റവും മോശം തലമുറയിൽ ശരിയായ മനുഷ്യനെയാണ് ഞാൻ തിരഞ്ഞെടുത്തതെന്ന് എനിക്ക് അഭിമാനത്തോടെ പറയാൻ കഴിയും' എന്നാണ് അർച്ചന ഇൻസ്റ്റഗ്രാമിൽ സ്റ്റോറിയായി പങ്കുവച്ചത്. ഇതോടൊപ്പം എല്ലാവർക്കും ഇങ്ങനെ ഒരാളെ ലഭിക്കാൻ ഞാൻ ആശംസിക്കുന്നുവെന്നും നടി കുറിച്ചു. ഇതോടെയാണ് താരം വിവാഹം കഴിക്കാൻ പോകുകയാണെന്ന ചർച്ചകൾ ആരാധകർക്കിടയിൽ നടന്നത്. എന്നാൽ താരം ഇതേക്കുറിച്ച് മറ്റ് പ്രതികരണങ്ങളൊന്നും നടത്തിയിട്ടില്ല.