വാഷിംഗ്ടൺ: വീട് വൃത്തിയാക്കാത്തതിന് ഭർത്താവിനെ കുത്തിപരിക്കേൽപ്പിച്ച് ഭാര്യ. യുഎസിലെ നോർത്ത് കരോലിനയിലാണ് സംഭവം നടന്നത്. സംഭവത്തിൽ ഇന്ത്യക്കാരിയായ അദ്ധ്യാപിക ചന്ദ്രപ്രഭ സിംഗിനെ (44) പൊലീസ് അറസ്റ്റ് ചെയ്തു. ഒക്ടോബർ 12നാണ് സംഭവം നടന്നത്. ഭർത്താവ് അരവിന്ദ് സിംഗ് ചികിത്സയിലാണ്. വീട് വൃത്തിയാക്കാത്തതിനാണ് ഭാര്യ തന്നെ കുത്തിയതെന്ന് അരവിന്ദ് പൊലീസിനോട് പറഞ്ഞു. കഴുത്തിലാണ് അരവിന്ദിന് പരിക്കേറ്റത്.

എന്നാൽ തർക്കത്തിനിടെ കത്തിയുമായി തിരിഞ്ഞപ്പോൾ അബദ്ധത്തിൽ ഭർത്താവിന്റെ ശരീരത്തിൽ കൊണ്ടെന്നാണ് ചന്ദ്രപ്രഭ മൊഴി നൽകിയത്. അരവിന്ദിനെ പൊലീസെത്തിയാണ് ആശുപത്രിയിൽ എത്തിച്ചത്. അറസ്റ്റിലായ ചന്ദ്രപ്രഭയ്ക്ക് മജിസ്ട്രേറ്റ് ആദ്യം ജാമ്യം നിഷേധിച്ചെങ്കിലും പിന്നീട് അനുവദിച്ചു. ഭർത്താവുമായി ആശയവിനിമയം നടത്തരുതെന്ന് കോടതി നിർദേശിച്ചിട്ടുണ്ട്. സംഭവത്തിന് പിന്നാലെ ചന്ദ്രയെ ജോലിയിൽ നിന്ന് സസ്‌പെൻഡ് ചെയ്തതായി അധികൃതർ അറിയിച്ചു.