പൊന്നാനി: പൊന്നാനി ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രസിഡന്റ് മുസ്തഫ വടമുക്ക് നയിക്കുന്ന ഗ്രാമപദയാത്ര പൊന്നാനി, ഈഴുവത്തിരുത്തി പ്രദേശങ്ങളിലെ വിവിധ സ്ഥലങ്ങളിൽ പര്യടനം നടത്തി മാറഞ്ചേരിയിൽ സമാപിച്ചു. സമാപനയോഗം കെ.പി.സി.സി വർക്കിംഗ് പ്രസിഡന്റ് എ.പി. അനിൽകുമാർ എം.എൽ.എ ഉദ്ഘാടനം ചെയ്തു. മറ്റു സംസ്ഥാനങ്ങളിലെ ബി.ജെ.പി ഇതര മുഖ്യമന്ത്രിമാർ ക്കെതിരെയും വിവിധ രാഷ്ട്രീയ പാർട്ടി നേതാക്കൾക്കെതിരെയും കേന്ദ്ര അന്വേഷണ ഏജൻസികൾ ചെറിയ കേസുകൾക്ക് പോലും അറസ്റ്റ് നടപടികൾ സ്വീകരിക്കുമ്പോൾ ശബരിമലയിലെ സ്വർണ്ണം ചെമ്പാക്കിയ സംഭവത്തിൽ മുഖ്യമന്ത്രിക്കെതിരെയോ സിപിഎം നേതാക്കൾക്കെതിരെയോ നടപടിയെടുക്കാത്തത് സി.പി.എം-ബി.ജെ.പി അന്തർധാരയാണ് വ്യക്തമാക്കുന്നതെന്ന് എ.പി.അനിൽകുമാർ എം.എൽ.എ ആരോപിച്ചു. ബി.ജെ.പിയും സി.പി.എമ്മും തമ്മിലുള്ള രഹസ്യധാരണയാണ് പി.എം ശ്രീ പദ്ധതിയിൽ ഇടതുപക്ഷമുന്നണിയിലെ പ്രധാന ഘടകകക്ഷിയായ സിപിഐയുടെ എതിർപ്പ് പോലും വകവയ്ക്കാതെ നടപ്പിലാക്കുവാൻ വേണ്ടി തീരുമാനിച്ചതെന്നും അനിൽകുമാർ പറഞ്ഞു. മുനീർ മാറഞ്ചേരി അദ്ധ്യക്ഷത വഹിച്ചു .കെ.പി.സി.സി ജനറൽ സെക്രട്ടറി പി.ടി. അജയ് മോഹൻ മുഖ്യപ്രഭാഷണം നടത്തി. എം.വി. ശ്രീധരൻ, എ.കെ. അലി, കല്ലാട്ടയിൽ ഷംസു , എ. പവിത്രകുമാർ, എം. അബ്ദുല്ലത്തീഫ്, ടി. ശ്രീജിത്ത്, ഇ. ആസാദ്, സി. ജാഫർ, ഇ. മജീദ്, പി. നൂറുദ്ദീൻ, സുലൈഖ റസാക്ക് എന്നിവർ സംസാരിച്ചു. ജാഥ ക്യാപ്ടൻ മുസ്തഫ വടമുക്ക് നന്ദി പറഞ്ഞു.