റാന്നി: പെരുനാട് - പെരുന്തേനരുവി റോഡിൽ യാത്രക്കാർക്ക് ഭീഷണിയായി കൊടും വളവിൽ കുഴികൾ. മാസങ്ങളായി റോഡിന്റെ അവസ്ഥ ഇതായിട്ടും അധികൃതർ വേണ്ട നടപടികൾ സ്വീകരിക്കുന്നില്ലെന്നാണ് നാട്ടുകാരുടെ പരാതി. കലുങ്ക് നിർമ്മാണത്തിലെ അശാസ്ത്രീയത മൂലമാണ് ഇവിടെ റോഡ് നശിക്കുന്നതെന്നാണ് നാട്ടുകാർ പറയുന്നത്. കലുങ്കിന്റെ രണ്ടു വശങ്ങളും ഉയർന്ന നിൽക്കുന്നതിനാൽ മഴയിൽ ഇവിടേക്ക് എത്തുന്ന വെള്ളം ഒലിച്ചു പോകാതെ റോഡിൽ കെട്ടിക്കിടക്കുന്നതുമൂലമാണ്‌ റോഡിൽ സ്ഥിരമായി കുഴികൾ രൂപപ്പെടുന്നത്. നിർമ്മാണ സമയത്ത് ഈ വിഷയം ബന്ധപ്പെട്ട അധികാരികളുടെ ശ്രദ്ധയിൽ പെടുത്തിയതാണെന്നും എന്നാൽ അവർ അത് കേൾക്കാൻ തയാറായില്ലെന്നും ആക്ഷേപമുണ്ട്. റീ ടാറിംഗ് പൂർത്തിയായതിനു ശേഷം മൂന്ന് പ്രാവശ്യമെങ്കിലും ഇവിടെ അറ്റകുറ്റപ്പണി നടത്തിട്ടുണ്ട്. എന്നാൽ യഥാർത്ഥ പ്രശ്നം പരിഹരിച്ചിട്ടില്ല. റോഡിൽ വീണ്ടും അപകടങ്ങൾ വർദ്ധിക്കുന്നുണ്ട്. അധികൃതർ ഇടപെട്ട് എത്രയും വേഗം ഇതിന് പരിഹാരം കാണണമെന്നാണ് നാട്ടുകാരുടെ ആവശ്യം.

.................................

കുഴിയിൽ ചാടാതിരിക്കാൻ വാഹനങ്ങൾ വെട്ടിച്ചു മാറ്റുമ്പോൾ അപകടത്തിൽപ്പെടുന്നത് പതിവാണ്. ഇതിന് എത്രയും വേഗം പരിഹാരം ഉണ്ടാകണം.

(സോമൻ , പ്രദേശവാസി)