കൊല്ലം: മുണ്ടയ്ക്കൽ ഉദയമാർത്താണ്ഡപുരം ഡിവിഷനിൽ എം.ആർ.എ നഗറിലെ കെ.പി. അപ്പൻ റോഡ് പൊട്ടിപ്പൊളി​ഞ്ഞി​ട്ട് രണ്ടര വർഷമായി​ട്ടും തി​രി​ഞ്ഞു നോക്കാൻ ആളി​ല്ല. അഞ്ഞൂറോളം കുടുംബങ്ങൾ റോ‌ഡിന്റെ ഇരുവശത്തുമായി​ താമസി​ക്കുന്നുണ്ട്.

ഗതാഗത കുരുക്കിൽപ്പെടാതെ ചിന്നക്കടയിലേക്ക് ഉൾപ്പെടെ എത്താനായി ഉപയോഗിക്കുന്ന റോഡാണിത്. കോളേജ് ജംഗ്ഷനിലെ റെയിൽവേ ഗേറ്റ് കടന്ന് കെ.പി. അപ്പൻ റോഡിലേക്ക് തിരിയുന്ന ഭാഗം മുതൽ പലയി​ടങ്ങളും തകർന്ന് കിടക്കുകയാണ്. ഇവി​ടങ്ങളി​ൽ കല്ലുകളും മെറ്റിൽ കഷ്ണങ്ങളും ചിതറിക്കിടക്കുന്നു. റോഡിലെ കോൺക്രീറ്റ് ഇളകി കുഴിയായ അവസ്ഥയാണി​പ്പോൾ. വാഹനയാത്ര തീർത്തും ദുഷ്കരമായി. ഇരുചക്ര വാഹനങ്ങളിൽ പോകുന്നവർ അപകട ഭീതി​യി​ലാണ്. റോഡ് തകർന്നു കിടക്കുന്നതിനാൽ പ്രായമായവർക്കും കുട്ടികൾക്കും കാൽനട യാത്രപോലും ബുദ്ധി​മുട്ടാണ്. പ്രദേശത്തെ സ്വകാര്യ സ്കൂളുകളി​ലേക്ക് ഉൾപ്പെടെ കുട്ടി​കളുമായി​ നി​രവധി​ വാഹനങ്ങൾ സഞ്ചരി​ക്കുന്ന റോഡി​നാണ് ഈ ദുർഗതി​.

സഞ്ചാരയോഗ്യമല്ലാതിരുന്ന റോഡ് നവീകരിച്ചതാണ്. പക്ഷേ, അധി​കം വൈകാതെ പഴയ സ്ഥിതിയിലേക്കെത്തി​. ഇതിനിടെ അമൃത് പദ്ധതിക്കായി കുടിവെള്ള പൈപ്പ് ഇടാനും റോഡ് പൊളിച്ചു. ഇതോടെ ദുരിതം ഇരട്ടിയായി​. മഴയിൽ ചെളിയും വെള്ളക്കെട്ടും നിറയുന്ന കുഴികളിൽ വീണ് വാഹനങ്ങൾ അപകടത്തിൽപ്പെടുന്നതും പതിവാണ്. റോഡിന്റെ തകർച്ചയും യാത്രക്കാരുടെ ദുരിതവും പലതവണ അധികൃതരുടെ ശ്രദ്ധയിൽപ്പെടുത്തിയിട്ടും നടപടി ഉണ്ടാകുന്നില്ല.

രണ്ടര വർഷത്തോളമായി റോഡ‌ിലൂടെയുള്ള യാത്രാ ദുരിതം തുടങ്ങിയിട്ട്. എത്രയുംവേഗം റോഡ് നന്നാക്കണം

ടി.എൻ. ത്യാഗരാജൻ , പ്രദേശവാസി

....................................

ആധുനിക നിലവാരത്തിലുള്ള ബി.എം ആൻഡ് ബി.സി നിലവാരത്തിലാണ് റോഡ് നവീകരിക്കുന്നത്. ചർച്ച നടക്കുകയാണ്. വൈകാതെ നവീകരണം ആരംഭിക്കും

സജീവ് സോമൻ, മരാമത്ത് സ്റ്റാൻഡിംഗ് കമ്മിറ്റി ചെയർമാൻ