കണ്ണനല്ലൂർ: കണ്ണനല്ലൂർ ജംഗ്ഷൻ വികസനവുമായി ബന്ധപ്പെട്ട് 5 ആഴ്ച മുമ്പ് ആരംഭി​ച്ച പ്രവൃത്തി​കൾ ഒച്ചി​ഴയും പോലെ. പകൽ മാത്രമാണ് നിലവിൽ പൊളിച്ചു മാറ്റൽ നടക്കുന്നത്. ധാരാളം വാഹനങ്ങൾ രാത്രി വൈകും വരെ സഞ്ചരിക്കുന്ന ജംഗ്ഷനിൽ അപകടങ്ങൾ ഭയന്നാണ് വളരെ സാവധാനത്തിൽ പൊളിക്കൽ നടത്തുന്നത്.

പൊളി​ക്കുന്ന ചി​ല കടകളുടെ ഷട്ടറുകൾ, ഇരുമ്പു ഭാഗങ്ങൾ എന്നിവ മാത്രമാണ് നീക്കം ചെയ്തത്. ഭിത്തികൾ പൊളി​ക്കുന്നത് ആരംഭിച്ചിട്ടേയില്ല. വാഹനങ്ങൾ കുറവുള്ള സമയങ്ങളി​ൽ പൊളിക്കണ്ടവയാണ് മിക്കതും. ഇവ സാങ്കേതിക സംവിധാനങ്ങൾ ഉപയോഗി​ച്ച് രാത്രി വേഗം പൊളിക്കാൻ കരാർഏറ്റെടുത്തവർക്ക് കഴിഞ്ഞിട്ടില്ല. പൊതു മരാമത്ത് വകുപ്പിന് കീഴിലെ കെ.ഡി.ആർ.ബിക്കാണ് കണ്ണനല്ലൂർ ജംഗ്ഷൻ വികസനത്തിന്റെ നിർമ്മാണ ചുമതലയും പൊളിക്കൽ ഉത്തരവദിത്വവും.
ഏറ്റെടുത്ത കെട്ടിടങ്ങൾ മെറ്റൽ സ്ക്രാപ്പ് ട്രേഡ് കോർപ്പറേഷൻ വഴിയാണ് ഇ ടെൻഡർ നടപടികൾ സെപ്തംബറി​ൽ പൂർത്തിയാക്കിയത്. തിരുവനന്തപുരം ആസ്ഥാനമായ ഫർണിച്ചർ കമ്പനി 36 ലക്ഷം രൂപയ്ക്കാണ് പൊളിച്ചു മാറ്റൽ കരാർ മാത്രം ഏറ്റെടുത്തത്. ഓണത്തിന് മുൻപുതന്നെ പൊളിക്കൽ പ്രവർത്തനങ്ങൾ ആരംഭിച്ചെങ്കിലും ഓണം കഴിയുന്നതുവരെ കച്ചവട സ്ഥാപനങ്ങൾക്ക് വേണ്ടി പ്രവർത്തനങ്ങൾ മന്ദഗതിയിലാക്കുകയായി​രുന്നു. ഒക്ടോബർ 13നകം മുഴുവൻ കെട്ടിടങ്ങളും പൊളിച്ചുമാറ്റണമെന്നാണ് കരാറെങ്കിലും പ്രവൃത്തി​കൾ ഇഴയുന്നത് ആശങ്ക സൃഷ്ടി​ക്കുന്നു.