കൊട്ടാരക്കര: കൊട്ടാരക്കര ടൗണിലെ പാർക്കിംഗ് പ്രശ്നം രൂക്ഷമാവുകയാണ്. നൂറുകണക്കിന് സർക്കാർ ഓഫീസുകളും സ്വകാര്യ സ്ഥാപനങ്ങളും കേന്ദ്ര സർക്കാർ സ്ഥാപനങ്ങളും സ്ഥിതി ചെയ്യുന്ന ഇവിടെ വിവിധ ആവശ്യങ്ങൾക്കായി വാഹനങ്ങളുമായി എത്തുന്നവർ പാർക്കിംഗ് സൗകര്യമില്ലാത്തതിനാൽ നന്നേ ബുദ്ധിമുട്ടുകയാണ്. വാഹനത്തിരക്ക് വർദ്ധിച്ച ടൗണിൽ എവിടെ പാർക്ക് ചെയ്താലും പിഴ ഉറപ്പായതോടെ, പലരും ഒന്നും രണ്ടും കിലോമീറ്റർ അകലെ വാഹനങ്ങൾ പാർക്ക് ചെയ്ത് കാൽനടയായിട്ടാണ് ടൗണിലെത്തുന്നത്.

പാർക്കിംഗ് ഗ്രൗണ്ടുകൾ നഷ്ടമായി

മാർക്കറ്റ് ജംഗ്ഷനിലെ മുൻസിപ്പൽ ഗ്രൗണ്ടായിരുന്നു ഇതിന് മുൻപ് ഒരു പരിഹാരമായി കണ്ടിരുന്നത്. നഗരസഭ ഗ്രൗണ്ട് പാർക്കിംഗ് ഗ്രൗണ്ടാക്കി മാറ്റുകയും പാർക്കിംഗ് ഫീസ് പിരിക്കാൻ ഹോം ഗാർഡുകളെ നിയമിക്കുകയും ചെയ്തിരുന്നു. എന്നാൽ, മുൻസിപ്പൽ ഗ്രൗണ്ടിൽ സാംസ്കാരിക നിലയത്തിന്റെ നിർമ്മാണ പണികൾ ആരംഭിച്ചതോടെ ഈ പാർക്കിംഗ് അവസാനിപ്പിച്ചു.

പാർക്കിംഗ് കേന്ദ്രത്തിൽ ലോറി ആധിപത്യം

• നിലവിൽ സൗകര്യമുള്ള ഒരിടം കൊട്ടാരക്കര മണികണ്ഠനാൽത്തറക്ക് സമീപം മുൻപ് എക്സൈസ് ഓഫീസ് സ്ഥിതി ചെയ്തിരുന്ന സ്ഥലമാണ്.
• കെട്ടിടം പൊളിച്ചതോടെ കൊട്ടാരക്കര മഹാഗണപതി ക്ഷേത്രം വകയാണ് വസ്തു എന്ന അവകാശവാദം ഉയരുകയും തർക്കം കോടതിയിലെത്തുകയും ചെയ്തിരുന്നു.
• തത്ക്കാലം വസ്തു പാർക്കിംഗ് ഗ്രൗണ്ടായി ഉപയോഗിക്കട്ടെ എന്ന തീരുമാനമായിരുന്നു പിന്നീട് ഉണ്ടായത്.
• കൊട്ടാരക്കര മിനി സിവിൽ സ്റ്റേഷനിലും എസ്.സി, എസ്.ടി കോടതിയിലും എത്തിച്ചേരുന്നവർക്ക് പാർക്കിംഗ് സൗകര്യം ഒരുക്കാനാണ് അന്ന് തീരുമാനിച്ചിരുന്നത്.
• എന്നാൽ, കഴിഞ്ഞ രണ്ടാഴ്ചയായി ഈ ഗ്രൗണ്ടിൽ ബാംഗ്ളൂരിൽ നിന്നും കർണ്ണാടകത്തിൽ നിന്നും കൊട്ടാരക്കര വെബ്കോ ഗോഡൗണിൽ എത്തുന്ന മൂന്നും നാലും ലോറികൾ പാർക്ക് ചെയ്യുന്നതായി പരാതിയുണ്ട്.
• അതിനാൽ , മറ്റു ചെറിയ വാഹനങ്ങൾക്കോ സിവിൽ സ്റ്റേഷനിലെത്തുന്നവരുടെ വാഹനങ്ങൾക്കോ പാർക്ക് ചെയ്യാൻ കഴിയുന്നില്ല.

കൊട്ടാരക്കര ടൗണിലെ രൂക്ഷമായ ഈ പാർക്കിംഗ് പ്രശ്നത്തിന് പരിഹാരം കാണാൻ ബന്ധപ്പെട്ടവർ അടിയന്തരമായി ഇടപെടണം.

നാട്ടുകാർ