കൊട്ടാരക്കര: പുത്തൂർ സായന്തനം വയോജന കേന്ദ്രത്തിൽ 'നിലാവ്' ഓപ്പൺ എയർ ഓഡിറ്റോറിയവും വയോപാർക്കും നാളെ ഉദ്ഘാടനം ചെയ്യും. ജില്ലാ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി 65 ലക്ഷം രൂപ വിനിയോഗിച്ചാണ് ഇവ നിർമ്മിച്ചത്. 2023 മാർച്ചിൽ ജില്ലാ പഞ്ചായത്ത് പ്രസിഡന്റ് പി.കെ.ഗോപൻ നിർമ്മാണ ഉദ്ഘാടനം നടത്തിയെങ്കിലും പൂർത്തിയാകാൻ വൈകി. സായന്തനത്തിലെ അന്തേവാസികളായ വയോജനങ്ങൾക്ക് കലാപരിപാടികൾ അവതരിപ്പിക്കാനും വിശ്രമിക്കാനും ഉല്ലസിക്കാനും ഉപകരിക്കുന്ന നിലയിലാണ് ഓപ്പൺ എയർ ഓഡിറ്റോറിയവും വയോ പാർക്കും നിർമ്മിച്ചത്. സാഹിത്യ സദസുകൾ, സാംസ്കാരി പരിപാടികൾ എന്നിവയ്ക്കും ഉപയോഗിക്കാൻ കഴിയും. നാളെ വൈകിട്ട് 4ന് ജില്ലാ പഞ്ചായത്ത് പ്രസിഡന്റ് പി.കെ.ഗോപൻ ഉദ്ഘാടനം ചെയ്യും. ജില്ലാ പഞ്ചായത്തംഗം വി.സുമാലാൽ, വെട്ടിക്കവല ബ്ളോക്ക് പഞ്ചായത്ത് പ്രസിഡന്റ് എസ്.രഞ്ജിത്ത്, പവിത്രേശ്വരം ഗ്രാമപഞ്ചായത്ത് പ്രസിഡന്റ് വി.രാധാകൃഷ്ണൻ എന്നിവർ പങ്കെടുക്കും.

ഒറ്റപ്പെട്ടുപോയവർക്ക് അഭയകേന്ദ്രം

• ജില്ലാ പഞ്ചായത്തിന്റെ ചുമതലയിൽ ഒന്നര കോടി രൂപ മുടക്കിയാണ് പുത്തൂർ പഴയചിറയിൽ സായന്തനം എന്ന പേരിൽ വയോജനകേന്ദ്രം സ്ഥാപിച്ചത്.
• പവിത്രേശ്വരം ഗ്രാമപഞ്ചായത്ത് ഇതിനായി 65 സെന്റ് ഭൂമി വിട്ടുനൽകി.
• 1.07 കോടി രൂപകൂടി മുടക്കി രണ്ടാം നിലയും നിർമ്മിച്ച് 2024 ഏപ്രിൽ മാസത്തിൽ ഉദ്ഘാടനം ചെയ്തു.
• പത്തനാപുരം ഗാന്ധിഭവനായിരുന്നു ആദ്യ മൂന്ന് വർഷക്കാലം പ്രവർത്തന ചുമതല.
• മാതൃകാപരമായ പ്രവർത്തനങ്ങളിലൂടെ സായന്തനം കൂടുതൽ ശ്രദ്ധനേടിയെടുത്തു.
• പിന്നീട് ജീവനം പാലിയേറ്റീവ് കെയർ സൊസൈറ്റിയെ നടത്തിപ്പ് ചുമതല ഏൽപ്പിച്ചു.
• അംഗസംഖ്യ വർദ്ധിച്ചുവെങ്കിലും വയോജനങ്ങൾക്ക് മാനസിക ഉല്ലാസത്തിനുള്ള സൗകര്യങ്ങളും പ്രവർത്തനങ്ങളും കുറഞ്ഞു.
• ജില്ലാ പഞ്ചായത്തിന്റെ ഫണ്ട് ഉപയോഗിച്ച് പ്രവർത്തനം നടത്തുന്നതിനൊപ്പം പുറമെ നിന്നുള്ള സഹായങ്ങളും ലഭിക്കുന്നുണ്ട്.
• വയോജന പാർക്കും പുതിയ സംവിധാനങ്ങളുമെത്തുന്നതോടെ പ്രവർത്തനം കൂടുതൽ മെച്ചപ്പെടുമെന്നാണ് പ്രതീക്ഷ.