കരുനാഗപ്പള്ളി: 2022-ലെ മയക്കുമരുന്ന് കേസിൽ പ്രതിയായി ഒളിവിൽ പോയ യുവാവ് മൂന്ന് വർഷത്തിന് ശേഷം കരുനാഗപ്പള്ളി പൊലീസിന്റെ പിടിയിലായി. ആലപ്പുഴ എടത്വ കരക്കട വീട്ടിൽ എബിൻ ജോസഫ് (26) ആണ് അറസ്റ്റിലായത്.

2022 ജൂൺ 22-നാണ് കേസിനാസ്പദമായ സംഭവം നടന്നത്. വിൽപ്പനയ്ക്കായി ബംഗളൂരുവിൽ നിന്നും കൊണ്ടുവന്ന 71 ഗ്രാം എം.ഡി.എം.എയുമായി രണ്ട് പേരെ കരുനാഗപ്പള്ളി പൊലീസ് പിടികൂടിയിരുന്നു. തുടർന്നുള്ള അന്വേഷണത്തിലാണ്, അറസ്റ്റിലായ പ്രതികൾക്ക് മയക്കുമരുന്ന് വിൽപ്പനയ്ക്കായി നൽകിയത് എബിൻ ജോസഫാണെന്ന് കണ്ടെത്തിയത്.

കൂട്ട് പ്രതികൾ അറസ്റ്റിലായ വിവരമറിഞ്ഞ് ഇയാൾ ഒളിവിൽ പോവുകയായിരുന്നു. കരുനാഗപ്പള്ളി പൊലീസിന്റെ നിരന്തരമായ നിരീക്ഷണത്തിലാണ് ഒളിവിൽ കഴിഞ്ഞിരുന്ന പ്രതിയെ പിടികൂടിയത്.

എസ്.എച്ച്.ഒ ബിജുവിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ അറസ്റ്റ് ചെയ്തത്. റിമാൻഡ് ചെയ്തു.