അഞ്ചാലുംമൂട്: കാഞ്ഞിരംകുഴി കെ.എസ്.ഇ.ബി ഓഫീസ് പരിധിയിലെ വേളിക്കാട് ട്രാൻസ്ഫോർമർ സമീപത്തെ വീട്ടുകാർക്ക് ഭീഷണിയാവുന്നു. . കാഞ്ഞാവേളി മൂലയിൽ താഴത്തിൽ പലകശേരി അഴകേശൻ സൗജന്യമായി നൽകിയ സ്ഥലത്ത് സ്ഥാപിച്ച ട്രാൻസ്ഫോർമറാണ് ചുറ്റുവേലിയൊക്കെ തകർന്ന് വീട്ടുകാരുടെ സ്വസ്ഥത കെടുത്തുന്നത്! പത്തു വർഷത്തോളം മുമ്പ് പരേതനായ അഴകേശൻ വീട് വാടകയ്ക്ക് കൊടുത്തി​രി​ക്കുകയാണ്.

36 വർഷം മുൻപ് കാഞ്ഞാവെളി- വേളിക്കാട് ഭാഗങ്ങളിൽ കയർപിരി ഫാക്ടറികളിലെ വോൾട്ടേജ് പ്രശ്നം പരിഹരിക്കാനാണ് ഈ ട്രാൻസ്ഫോർമർ സ്ഥാപി​ച്ചത്. ഇടംകൊടുക്കാൻ മറ്റാരും തയ്യാറാവാതെ വന്നതോടെ അഴകേശൻ ഇരുകൈയും നീട്ടി കെ.എസ്.ഇ.ബി.യെ സ്വീകരിച്ചു. പക്ഷേ, കാലങ്ങൾ പിന്നിട്ടതോടെ ട്രാൻസ്ഫോർമറിന് ചുറ്റുമുണ്ടായി​രുന്ന സംരക്ഷണ വേലി തുരുമ്പെടുത്ത് തകർന്നു. ഇതോടെ അപകട ഭീതിയായി. ഇതി​ങ്ങനെ കി​ടക്കാൻ തുടങ്ങി​യി​ട്ട് വർഷങ്ങളായെങ്കിലും കെ.എസ്.ഇ.ബിക്കാർ കണ്ടഭാവം നടിക്കുന്നില്ല. ചുറ്റുവേലി നവീകരിക്കണമെന്ന് ആവശ്യപ്പെട്ട് വീട്ടുകാർ ഒട്ടേറെ തവണ പരാതി നൽകിയിട്ടും യാതൊരു നടപടിയും അധികൃതർ സ്വീകരിച്ചി​ല്ല. ട്രാൻസ്ഫോർമർ ഉള്ളതിനാൽ, ചുറ്റുമതിൽ പൂർണമായി കെട്ടാൻ കഴിയാത്ത അവസ്ഥയാണ്. മതി​ൽ കടന്നുപോകുന്ന ഭാഗത്താണ് ട്രാൻസ്ഫോർമർ നി​ൽക്കുന്നത്. വീട്ടി​ൽ കുട്ടി​കൾ ഉള്ളതും വീട്ടുകാരെ ആശങ്കപ്പെടുത്തുന്നു. ട്രാൻസ്ഫോർമറിലേക്കുള്ള പവർ കേബിളുകളുടെ പുറം ചട്ടയും ദ്രവിച്ചിട്ടുണ്ട്.

നിലവിൽ വേലി പൊളിഞ്ഞ ഭാഗത്ത് ഞങ്ങൾ തന്നെ പ്ലാസ്റ്റിക് സാധനങ്ങൾ കൊണ്ട് മറച്ചിരിക്കുകയാണ്. വേലി നവീകരിക്കാൻ നടപടി സ്വീകരിക്കുകയോ ചുറ്റുമതിൽ പൂർത്തിയാക്കാൻ അനുമതി നൽകുകയോ ചെയ്യണമെന്നാണ് ആവശ്യം

വീട്ടുകാർ