അന്നമനട : നെടുമ്പാശ്ശേരി വിമാനത്താവളത്തിൽ നിന്നും വിമാനം മെല്ലെ ഉയർന്നപ്പോൾ, അവരുടെ ഹൃദയമിടിപ്പും ഉയർന്നു. അന്നമനട പഞ്ചായത്തിലെ 28 ഹരിത കർമ്മ സേനാംഗങ്ങൾക്ക് അത് സ്വപ്നങ്ങളും പ്രതീക്ഷകളും നിറഞ്ഞ നിമിഷമായിരുന്നു. ദിനംപ്രതി മണ്ണിനോടും മാലിന്യത്തോടും ഒപ്പം ജീവിതം നയിക്കുന്ന ഇവരുടെ ജീവിതത്തിലേക്ക് കടന്നുവന്നത് പ്രതീക്ഷിക്കാത്ത അനുഭവങ്ങൾ. ബംഗളൂരുവിലെ നിയോൺ വിളക്കും ഉയർന്ന കെട്ടിടങ്ങളും അവരുടെ കണ്ണുകളിൽ അത്ഭുതം നിറച്ചു. ഓർമകളിൽ എന്നും സൂക്ഷിക്കാൻ നിറമുള്ള നിമിഷങ്ങൾ.

വിനോദത്തിന്റെയും പഠനത്തിന്റെയും സംഗമമായ ആ യാത്ര അവർക്കെല്ലാം പുതുമയായിരുന്നു. പാർക്കുകളിലും സവിശേഷതകളാലും പേരുകേട്ട ബംഗളൂരു നഗരത്തിന്റെ വേറിട്ടമുഖം കാണാൻ കഴിഞ്ഞപ്പോൾ അവരിൽ പലരും പറഞ്ഞു: 'ഇതാണ് ജീവിതത്തിൽ ഒരിക്കലെങ്കിലും അനുഭവിക്കേണ്ട അനുഭവം'. യാത്രയുടെ അവസാന ഭാഗം ട്രെയിൻ വഴി ആലുവയിലേക്കായിരുന്നു. പക്ഷേ ആകാശയാത്രയുടെ ഓർമകളാണ് ഇന്നും കർമ്മസേനാംഗങ്ങളെ പ്രചോദിപ്പിക്കുന്നത്. സംഘത്തെ നയിച്ചത് പഞ്ചായത്ത് പ്രസിഡന്റ് പി.വി.വിനോദായിരുന്നു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ മഞ്ജു സതീശനും ഐ.ആർ.ടി.സി കോ ഓർഡിനേറ്റർ വി.ജി.അനശ്വരയും സംഘത്തിൽ പങ്കെടുത്തു. ശുചിത്വമുണ്ടാക്കാനുള്ള അശ്രാന്ത പരിശ്രമത്തിനിടയിൽ നടത്തിയ ഈ വിനോദയാത്ര, അവരുടെ ജീവിതത്തിൽ പ്രതീക്ഷയും ആത്മവിശ്വാസവും പകർന്നു.