വടക്കാഞ്ചേരി : വാഴാനി ഡാമിൽ ഇനി സംഗീതം പൊഴിക്കും ജലധാരയും (മ്യൂസിക്കൽ ഫൗണ്ടൻ). ട്രയൽ റൺ സേവ്യർ ചിറ്റിലപ്പിള്ളി എം.എൽ.എയുടെ നേതൃത്വത്തിൽ വിജയകരമായി പൂർത്തിയായി. സംഗീതത്തിന്റെ മാസ്മരികതയിൽ ജലം മുകളിലേക്കുയർന്ന് തുള്ളി കളിച്ചപ്പോൾ വാഴാനിക്കത് പുത്തൻ അനുഭവമായി. 85 ശതമാനം പ്രവർത്തനങ്ങൾ പൂർത്തിയായതായി അധികൃതർ അറിയിച്ചു.
ജലധാരയുടെ നിർമ്മാണോദ്ഘാടനം ഫെബ്രുവരി 16ന് മന്ത്രി പി.എ. മുഹമ്മദ് റിയാസാണ് നിർവഹിച്ചത്. എ.സി. മൊയ്തീൻ ടൂറിസം മന്ത്രിയായിരിക്കുമ്പോഴാണ് സംഗീതജലധാര അടക്കമുള്ള വികസന പ്രവർത്തനങ്ങൾ പ്രഖ്യാപിച്ചത്. ഇറിഗേഷൻ വകുപ്പിന്റെ സ്ഥലത്ത് ടൂറിസം വകുപ്പ് നിർമ്മാണ പ്രവർത്തനങ്ങൾ ഏറ്റെടുക്കുന്നതിലെ സാങ്കേതികത്വം ഈ പദ്ധതിക്കും വിഘാതമായി. ഇതിന് പരിഹാരം കാണാൻ സേവ്യർ ചിറ്റിലപ്പിള്ളി ജില്ലാ ടൂറിസം പ്രമോഷൻ കൗൺസിൽ, ടൂറിസം വകുപ്പ്, ജലസേചന വകുപ്പ് എന്നിവയുടെ സംയുക്ത യോഗം വിളിച്ചു ചേർത്തു. ചുവപ്പ് നാടകൾ അങ്ങനെയാണ് അഴിഞ്ഞത്.
തെക്കുംകര പഞ്ചായത്ത് പ്രസിഡന്റ് ടി.വി.സുനിൽകുമാർ, വൈസ് പ്രസിഡന്റ് ഇ.ഉമാലക്ഷ്മി, പി.ആർ.രാധാകൃഷ്ണൻ, വി.സി.സജീന്ദ്രൻ, ഷൈനി ജേക്കബ്, വി.ജി.സുരേഷ്, വി.ജി ഗോപിക, മോഹന ചന്ദ്രൻ, എം.ആർ.സോമനാരായണൻ എന്നിവർ പരീക്ഷണ പ്രവർത്തനം വിലയിരുത്താൻ എം.എൽ.എയോടൊപ്പം ഉണ്ടായിരുന്നു.

ട്രയൽ റൺ വിജയകരം

• പൂന്തോട്ടത്തിനുള്ളിലാണ് ജലധാര നിർമ്മാണം.
• പൂൾ, കൺട്രോൾ റൂം നിർമ്മാണം, പ്ലമ്പിംഗ്, സിവിൽ പ്രവൃത്തികൾ, ടെസ്റ്റിംഗ്, മൾട്ടി മീഡിയ ഷോ, ലേസർ ആൻഡ് വീഡിയോ പ്രൊജക്ഷൻ ഓൺ അക്വാ സ്‌ക്രീൻ എന്നിവ ഉൾപ്പെട്ട പദ്ധതിയാണ് യാഥാർത്ഥ്യമാകുന്നത്.
• കേരള ഇറിഗേഷൻ ഡെവലപ്‌മെന്റ് കോർപ്പറേഷനാണ് കരാറുകാർ.
• ഉപകരാറുകാരായ ബംഗളൂരു ബി.എൻ.എയാണ് പ്രവർത്തനം നടത്തുന്നത്.