പാറശാല: പാറശാല ബ്ലോക്ക് പഞ്ചായത്ത് നടപ്പിലാക്കി വരുന്ന രോഗമില്ലാത്ത ഗ്രാമം പദ്ധതിയുടെ അഞ്ചാം ഘട്ട പ്രവർത്തനങ്ങൾക്ക് കുളത്തൂർ ഗ്രാമപഞ്ചായത്തിൽ തുടക്കമായി. പദ്ധതിയുടെ ഭാഗമായുള്ള മെഡിക്കൽ ക്യാമ്പ് കുളത്തൂർ എൻ.എസ്.എസ് കരയോഗം ഹാളിൽ ബ്ലോക്ക് പഞ്ചായത്ത് പ്രസിഡന്റ് എസ്.കെ.ബെൻഡാർവിൻ ഉദ്‌ഘാടനം ചെയ്തു. ബ്ലോക്ക് പഞ്ചായത്ത് അംഗം ടി.കുമാർ അദ്ധ്യക്ഷത വഹിച്ചു. കുളത്തൂർ ഗ്രാമ പഞ്ചായത്ത് പ്രസിഡന്റ് ഗീത സുരേഷ് മുഖ്യാതിഥിയായി. പൂവാർ സി.എച്ച്.സി. മെഡിക്കൽ ഓഫീസർ ഡോ.ലത റിപ്പോർട്ട് അവതരിപ്പിച്ചു. ഡോക്ടർമാരായ പ്രവീൺ,അശ്വതി,സിമി,എച്ച്.ഐ മാരായ റോബിൻ,ജെയിൻ,പൂവാർ സി.എച്ച്.സി പി.ആർ.ഒ അവിലേഷ്, ഹെൽത്ത് സൂപ്പർവൈസർ സന്തോഷ് കുമാർ, എന്നിവർ പങ്കെടുത്തു. തിരുവനന്തപുരം ആർ.സി.സി,പാറശാല താലൂക്ക് ആസ്ഥാന ആശുപത്രി, ശ്രീ മൂകാംബിക മെഡിക്കൽ കോളേജ്,പാറശാല സരസ്വതി മൾട്ടി സ്പെഷ്യാലിറ്റി ആശുപത്രി,പൂവാർ കമ്മ്യൂണിറ്റി ഹെൽത്ത് സെന്റർ,ഊരമ്പ് സുരക്ഷാ ആശുപത്രി എന്നിവിടങ്ങളിലെ ഡോക്ടർമാരും മറ്റ് ഉദ്യോഗസ്ഥരും ക്യാമ്പിന് നേതൃത്വം വഹിച്ചു.