വെള്ളറട: കായിക മേഖലയിൽ യുവതലമുറക്ക് മികച്ച പരിശീലന സൗകര്യം ഉറപ്പുവരുത്തുന്നതിനുവേണ്ടി സംസ്ഥാന സർക്കാർ ഒരു പഞ്ചായത്തിൽ 'ഒരു കളിസ്ഥലം' പദ്ധതിയുടെ നവീകരണ ഉദ്ഘാടനം 22ന് ഉച്ചയ്ക്ക് 2. 30ന് മന്ത്രി വി.അബ്ദുറഹിമാൻ നിർവഹിക്കും. സി.കെ. ഹരീന്ദ്രൻ എം.എൽ.എ അദ്ധ്യക്ഷത വഹിക്കും. പാറശാല നിയോജകമണ്ഡലത്തിലെ 8 പഞ്ചായത്തുകളിൽ സംസ്ഥാന കായികവകുപ്പിന്റെ 50 ലക്ഷവും എം.എൽ.എയുടെ ആസ്തി വികസന ഫണ്ടിൽ നിന്നുള്ള 50 ലക്ഷവും ചേർത്ത് ഒരുകോടി രൂപ ചെലവഴിച്ചാണ് നിർമ്മാണം.

പെരുങ്കടവിള,ആയിരൂർ ഗവ.എൽ.പി.എസ് സ്റ്റേഡിയം,കൊല്ലയിൽ പഞ്ചായത്തിലെ മഞ്ചവിളാകം സ്റ്റേഡിയം,​പാറശാല ഗ്രാമപഞ്ചായത്തിലെ കലാഗ്രാമം സ്റ്റേഡിയം,​അമ്പൂരി കുട്ടമല ഗവ.യു.പി.എസ് സ്റ്റേഡിയം,​ഒറ്റശേഖരമംഗലം കുറ്ററ സ്റ്റേഡിയം,​ധനുവച്ചപുരം ഗവ.ഗേൾസ് ഹൈസ്കൂൾ സ്റ്റേഡിയം,​കുന്നത്തുകാൽ ഗ്രാമപഞ്ചായത്ത് സ്റ്റേഡിയം,​ചെമ്പൂര് ഡി.അംബ്രോസ് മെമ്മോറിയൽ സ്റ്റേഡിയം തുടങ്ങിയവ ചെമ്പൂര് ബഥേൽ ഓഡിറ്റോറിയത്തിൽ ഉദ്ഘാടനം ചെയ്യും. ജില്ല പഞ്ചായത്ത് പ്രസിഡന്റ് ഡി.സുരേഷ് കുമാർ,പെരുങ്കടവിള ബ്ളോക്ക് പഞ്ചായത്ത് പ്രസിഡന്റ് വി.താണുപിള്ള,​ഗ്രാമപഞ്ചായത്ത് പ്രസിഡന്റുമാർ,​വിവിധ രാഷ്ട്രീയ കക്ഷി പ്രതിനിധികളും പങ്കെടുക്കും.