മാന്നാർ: പത്തനംതിട്ട-ആലപ്പുഴ ജില്ലകളിലെ പരുമല-മാന്നാർ പ്രദേശങ്ങളെ ബന്ധിപ്പിക്കുന്നതും മാന്നാർ ടൗണിലെ ഗതാഗതത്തിരക്കിനു പരിഹാരമാകുന്നതുമായ കുരട്ടിക്കാട് കോട്ടയ്ക്കൽ കടവിൽ വലിയപാലം നിർമ്മാണത്തിന് സാങ്കേതികാനുമതിയായി. 138310000 കോടി രൂപയാണ് നിർമ്മാണത്തിനായി ലഭിച്ചത്. 25 വർഷം മുമ്പ് നിർമ്മിച്ച ആംബുലൻസ് പാലത്തിലൂടെയാണ് നിലവിൽ ജനങ്ങളുടെ സഞ്ചാരം. വലിയവാഹനങ്ങൾക്ക് പോകാൻ കഴിയാത്തതിനാൽ വേണ്ടത്ര പ്രയോജനം ഈ പാലം കൊണ്ട് ലഭിച്ചിരുന്നില്ല. നാട്ടുകാരുടെ നിരന്തര ആവശ്യത്തെ തുടർന്ന് മന്ത്രി സജി ചെറിയാൻ നാലര വർഷംമുമ്പാണ് ഇവിടെ വലിയപാലം പണിയുന്നതിനായി നടപടികൾ സ്വീകരിച്ചത്. ഭരണാനുമതി ലഭിക്കുകയും മണ്ണ്പരിശോധന അടക്കമുള്ള നടപടികൾക്ക് തുടക്കം കുറിച്ചെങ്കിലും സാങ്കേതിക തടസങ്ങളിൽ കുരുങ്ങി പണി നീണ്ടുപോവുകയായിരുന്നു.പത്തനംതിട്ട ജില്ലാ അതിർത്തിയായ കടപ്ര പഞ്ചായത്തിൽ പാലത്തിന്റെ അപ്രോച്ച് റോഡിന് വീതികൂട്ടണമെങ്കിൽ ദേവസ്വം ബോർഡിന്റെ സ്ഥലം വിട്ടുകിട്ടണമെന്നതായിരുന്നു വലിയ കടമ്പ. രണ്ട് വർഷം മുമ്പ് നടന്ന മന്ത്രിതല ചർച്ചയിൽ 20 സെന്റ് സ്ഥലം പാലംപണിക്കായി വിട്ടുനൽകുവാൻ ദേവസ്വംബോർഡുമായി ധാരണയായതോടെയാണ് പാലം പണി നിർമ്മാണത്തിനുള്ള നടപടികൾക്ക് വേഗത്തിലായത്. പാലം യാഥാർത്ഥ്യമാകുന്നതോടെ മാന്നാറിലെ ഗതാഗതക്കുരുക്കിന് പരിഹാരമാകും.പരുമല പള്ളി, പമ്പാ കോളേജ്, പനയന്നാർ കാവ് ക്ഷേത്രം എന്നിവിടങ്ങളിലേക്ക് തിരക്കിൽപ്പെടാതെ എളുപ്പത്തിൽ പോകാൻ കഴിയും. മാവേലിക്കര ഭാഗത്ത് നിന്ന് വരുന്ന വാഹനങ്ങൾക്ക് മാന്നാർ സ്റ്റോർ ജംഗ്ഷനിലൂടെ കുരട്ടിക്കാട് വഴി ഈ പാലത്തിലൂടെ പരുമല തിക്കപ്പുഴ എത്തി പുതിയ ഉപദേശിക്കടവ് പാലത്തിലൂടെ തിരുവല്ല ഭാഗത്തേക്ക് എളുപ്പത്തിൽ എത്തിച്ചേരാൻ കഴിയുന്ന ഒരു സെമി ബൈപാസ് റോഡായി ഉപയോഗിക്കാം.

.........................

# ദേവസ്വം ബോർഡിന്റെ സ്ഥലം വിട്ടുകിട്ടി

കെ.ആർ.സി വായനശാല പൊതുജനങ്ങളിൽ നിന്ന് ഒപ്പ് ശേഖരണം നടത്തി നിരന്തരമായി ആവശ്യം ഉന്നയിച്ചതിന്റെ അടിസ്ഥാനത്തിലാണ് 25 വർഷങ്ങൾക്ക് മുമ്പ്ആംബുലൻസ് പാലം യാഥാർത്ഥ്യമായത്. പിൽക്കാലത്ത് ഈ പാലത്തിലെ അസൗകര്യം ബോധ്യപ്പെടുത്തി അന്തരിച്ച മുൻ എം.എൽ.എ കെ.കെ രാമചന്ദ്രൻ നായർക്ക് കെ.ആർ.സി വായനശാല മെമ്മോറാണ്ടം സമർപ്പിച്ചതിന്റെ ഫലമായി 4 കോടി രൂപാ ബഡ്ജറ്റിൽ വകയിരുത്തിയിരുന്നു. പിന്നീട് സജി ചെറിയാൻ എം.എൽ.എയുടെ ഇടപെടലിൽ 14 കോടിയായി തുക ഉയർത്തി ഭരണാനുമതി നേടിയെടുക്കുകയായിരുന്നു.

സലിം പടിപ്പുരയ്ക്കൽ, ഗ്രാമ പഞ്ചായത്തംഗം, പ്രസിഡന്റ് കെ.ആർ.സി വായനശാല