കളമശേരി: നിയമസഭാ മണ്ഡലത്തിലെ 160 സ്പോർട്ട്സ് ക്ലബുകൾക്ക് വ്യവസായ മന്ത്രി പി. രാജീവ് സമ്പൂർണ സ്പോർട്ട്സ് കിറ്റുകൾ സമ്മാനിച്ചു. യുവതക്കൊപ്പം കളമശേരി പദ്ധതിയുടെ ഭാഗമായാണ് കിറ്റുകൾ നൽകിയത്. കളിച്ചു തോൽപ്പിക്കാം ലഹരിയെ എന്ന സന്ദേശം നൽകിയാണ് പദ്ധതി നടപ്പാക്കുന്നത്. ഏലൂർ ടൗൺഹാളിൽ നടന്ന പരിപാടിയിൽ ഫുട്ബാൾ, ക്രിക്കറ്റ്, വോളിബാൾ തുടങ്ങി വിവിധ ഇനം കായിക ഇനങ്ങൾക്കാവശ്യമുള്ള സ്പ്പോർട്ട്സ് ഉപകരണങ്ങളും ചെസ്, കാരം ബോർഡ് തുടങ്ങിയവയും അടങ്ങിയ കിറ്റാണ് നൽകിയത്. മുത്തൂറ്റ് ഗ്രൂപ്പ്, ഈസ്റ്റേൺ, കനറാ ബാങ്ക് എന്നിവരുടെ സഹകരണത്തോടെയാണ് പദ്ധതി. ഏലൂർ നഗരസഭാ ചെയർപേഴ്സൺ എ.ഡി. സുജിൽ അദ്ധ്യക്ഷനായി. മുത്തൂറ്റ് ഗ്രൂപ്പ് എം.ഡി ജോർജ് അലക്സാണ്ടർ മുത്തൂറ്റ്, ഒളിമ്പ്യൻ മേഴ്സിക്കുട്ടൻ, നവാസ് മീരാൻ, മൊയ്തീൻ നൈന, ജോർജ് തോമസ്, എ.ആർ. രഞ്ജിത് തുടങ്ങിയവർ പങ്കെടുത്തു.