കൊച്ചി: തീവ്ര വോട്ടർപട്ടിക പരിഷ്‌കരണ (എസ്.ഐ. ആർ) നടപടികൾ ജില്ലയിൽ പുരോഗമിക്കുന്നു. നാലാം ദിവസമായ ഇന്നലെ വൈകിട്ട് നാലുവരെ വിതരണം ചെയ്തത് 3,21,229 എന്യൂമറേഷൻ ഫോറം. ഏറ്റവും കൂടുതൽ വിതരണം ചെയ്തത് കുന്നത്തുനാട് താലൂക്കിൽ. 32,556. രണ്ടാംശനിയും ഞായറാഴ്ചയുമായ ഇന്നും നാളെയും ജില്ലാ ഭരണകൂടവും ബി.എൽ.ഒമാരും ബന്ധപ്പെട്ട ഉദ്യോഗസ്ഥരും പരമാവധി പേരിലേക്ക് ഫോറം എത്തിക്കുമെന്ന് കളക്ടർ ജി. പ്രിയങ്ക പറഞ്ഞു.

മുഴുവൻ വോട്ടർമാർക്കും ഫോറം എത്തിക്കാൻ 2,325 ബി.എൽ.ഒമാരെയാണ് നിയോഗിച്ചത്. സുതാര്യവും ആയാസരഹിതവുമായ നടപടിയാണ് വോട്ടർപട്ടിക പരിഷ്‌കരണമെന്നും ആശങ്കപ്പെടേണ്ട സാഹചര്യമില്ലെന്നും കളക്ടർ പറഞ്ഞു.

ഡിസംബർ നാലുവരെനീളുന്ന ആദ്യഘട്ടത്തിൽ ഫോറം വിതരണത്തിനാണ് മുൻഗണന. തുടർന്നുള്ള ഘട്ടങ്ങളിൽ പൂരിപ്പിച്ച ഫോറം വാങ്ങും. എത്തിപ്പെടാൻ ബുദ്ധിമുട്ടുള്ള സ്ഥലങ്ങളിൽ വിതരണം ചെയ്യുന്നതോടൊപ്പം പൂരിപ്പിച്ച് വാങ്ങും. ആളില്ലാത്ത വീടുകളിൽ വീണ്ടും ബി.എൽ.ഒമാരെത്തും. വാർത്താസമ്മേളനത്തിൽ ഇലക്ഷൻ ഡെപ്യൂട്ടി കളക്ടർ സുനിൽ മാത്യുവും ഉദ്യോഗസ്ഥരും പങ്കെടുത്തു.