50 കുടുംബങ്ങൾ ദുരിതത്തിൽ
കട്ടപ്പന: കാഞ്ചിയാർ തൊപ്പിപ്പാളയിൽ 60 വർഷത്തിലേറെയായി പ്രദേശവാസികൾ ഉപയോഗിച്ചുവന്ന നടപ്പുവഴി പ്രദേശവാസി കെട്ടിയടച്ചതായി പരാതി. തൊപ്പിപ്പാള നഗർ റോഡിൽനിന്ന് കാവടിക്കവല കോൺക്രീറ്റ് റോഡിലേക്കുള്ള നടപ്പുവഴിയാണ് മതിൽകെട്ടി അടച്ചത്. 50ലേറെ കുടുംബങ്ങൾ ദിവസവും കടന്നുപോകുന്ന പാതയാണിത്. നടപ്പുവഴി അടച്ചതോടെ രണ്ടര കിലോമീറ്റർ കൂടുതൽ ചുറ്റി സഞ്ചരിക്കേണ്ട അവസ്ഥയാണ്. ഇത് സ്‌കൂൾ വിദ്യാർത്ഥികളെയും തൊഴിലാളികളെയും ബുദ്ധിമുട്ടിക്കുന്നു. കാഞ്ചിയാർ പഞ്ചായത്തിൽ ഉൾപ്പെടെ പരാതി നൽകിയിട്ടും നടപടിയില്ല. അടിയന്തര നടപടി സ്വീകരിക്കാത്തപക്ഷം സമരം ആരംഭിക്കുമെന്ന് നാട്ടുകാർ അറിയിച്ചു.