മുതലക്കോടം: തൊടുപുഴ ഉപജില്ല സ്‌കൂൾ കലോത്സവത്തിന് ഇന്ന് മുതലക്കോടത്ത് തുടക്കം കുറിക്കും. സേക്രട്ട് ഹാർട്ട് ഗേൾസ് ഹൈസ്‌കൂൾ, സെന്റ് ജോർജ് പാരിഷ് ഹാൾ, സെന്റ് ജോർജ് യു.പി സ്‌കൂൾ, സെന്റ് ജോർജ് ഹൈസ്‌കൂൾ എന്നീ നാല് വേദികളിലെ 12 സ്റ്റേജുകളിൽ വ്യാഴാഴ്ച വരെയാണ് മത്സരങ്ങൾ നടക്കുന്നത്. രാവിലെ 9 മുതൽ രചനാ മത്സരങ്ങൾ സെന്റ് ജോർജ് യു.പി സ്‌കൂളിൽ നടത്തും. സ്റ്റേജ് മത്സരങ്ങൾ നാളെ രാവിലെ 9 മുതൽ ആരംഭിക്കുന്നതാണ്. കലോത്സവത്തിന്റെ ഉദ്ഘാടനം നാളെ 10ന് തൊടുപുഴ മുൻസിപ്പൽ ചെയർമാൻ കെ.ദീപക് നിർവഹിക്കും. സബ് ജില്ലയിലെ 98 സ്‌കൂളുകളിൽ നിന്നായി നാലായിരത്തിലധികം മത്സരാർത്ഥികൾ കലോത്സവത്തിൽ പങ്കെടുക്കുമെന്ന് തൊടുപുഴ ഉപജില്ല വിദ്യാഭ്യാസ ഓഫീസർ എസ്.ലീന, ജനറൽ കൺവീനർ സുനി എം.കുര്യൻ, പബ്ലിസിറ്റി കൺവീനർ ദീപു ജോസ് എന്നിവർ അറിയിച്ചു.