മിമിക്രിയിലൂടെയും കോമഡി വേദികളിലൂടെയും മലയാളികൾക്ക് സുപരിചിതനായ ഉല്ലാസ് പന്തളത്തിന്റെ ഒരു വീഡിയോ അടുത്തിടെ സോഷ്യൽ മീഡിയയിൽ വൈറലായിരുന്നു. ഊന്നുവടിയുടെ സഹായത്തോടെ നടക്കുന്ന ഉല്ലാസായിരുന്നു വീഡിയോയിലുണ്ടായിരുന്നത്. മുഖത്തെ ഒരുഭാഗം കോടിയത് പോലെയുണ്ടായിരുന്നു. സ്‌ട്രോക്ക് വന്നതാണ് ഈയവസ്ഥയിലെത്തിച്ചത്. നടനെ സന്ദർശിച്ചിരിക്കുകയാണ് സംവിധായകൻ അഖിൽ മാരാർ.

ഫേസ്ബുക്കിലൂടെ ഉല്ലാസിനൊപ്പം നിൽക്കുന്ന ചിത്രവും അഖിൽ മാരാർ പങ്കുവച്ചിട്ടുണ്ട്. വയ്യാത്ത ആളുടെ കൂടെ ഫോട്ടോ ഇട്ട് റീച്ച് എന്നൊക്കെ ഉള്ള കമന്റുകൾ ഒഴിവാക്കണമെന്നും ഒരിക്കൽ നിങ്ങളെ ചിരിപ്പിച്ച സന്തോഷിപ്പിച്ചവർ ഇന്നും ഇവിടെ ജീവിക്കുന്നു എന്ന ഓർമപ്പെടുത്തൽ ആണ് ഈ ഫോട്ടോയെന്നും അദ്ദേഹം കുറിച്ചു. താൻ എന്ത് ചെയ്തു എന്ന ചോദ്യത്തിനുള്ള ഉത്തരം താനും ഉല്ലാസേട്ടനും മാത്രം അറിഞ്ഞാൽ മതിയെന്നും അഖിൽ മാരാർ വ്യക്തമാക്കി.

ഫേസ്‌ബുക്ക് പോസ്റ്റിന്റെ പൂർണ്ണരൂപം

2013ൽ ഗോകുലം സ്റ്റാഫ് അസോസിയേഷന്റെ വാർഷികത്തിനു കൊച്ചി ഗോകുലം ഗ്രാൻഡിൽ ഞാൻ സംവിധാനം ചെയ്ത ഷോയിൽ സ്കിറ്റ് ഡബ് ചെയ്യാൻ വന്നപ്പോൾ ആണ് ഞങ്ങൾ ആദ്യമായി പരിചയപെടുന്നത് പിന്നീട് വല്ലപ്പോഴും വിളിക്കും കഴിഞ്ഞ വർഷം ഒരു സിനിമയുടെ പ്രിവ്യൂ ഷോ സമയമാണ് അവസാനമായി കണ്ടത്..

ഒരു പാട് വേദിയിൽ നമ്മളെ ചിരിപ്പിച്ച ഒരു കലാകാരൻ വീണ് പോയത് കണ്ടപ്പോൾ വിഷമമായി... കലാകാരൻ പോരാളി ആണ്.. അവന്റെ വേദനയിലും അവൻ സദസ്സിനെ ചിരിപ്പിക്കും..എത്രയും വേഗം അസുഖം ഭേദമായി ഉല്ലാസേട്ടൻ തിരിച്ചു വരട്ടെ...എല്ലാ പ്രാർത്ഥനകളും.

NB: വയ്യാത്ത ആളുടെ കൂടെ ഫോട്ടോ ഇട്ട് റീച്ച് എന്നൊക്കെ ഉള്ള കമന്റുകൾ ഒഴിവാക്കുക.. ഒരിക്കൽ നിങ്ങളെ ചിരിപ്പിച്ച സന്തോഷിപ്പിച്ചവർ ഇന്നും ഇവിടെ ജീവിക്കുന്നു എന്ന ഓർമപ്പെടുത്തൽ ആണ് ഈ ഫോട്ടോ.. ഞാൻ എന്ത് ചെയ്തു എന്ന ചോദ്യത്തിനുള്ള ഉത്തരം ഞാനും ഉല്ലാസേട്ടനും മാത്രം അറിഞ്ഞാൽ മതി...