തിരുവല്ല : കടപ്ര പഞ്ചായത്തിലെ മൂന്നും നാലും പത്തും വാർഡിലുടെ ആലംതുരുത്തി ഭാഗത്തുള്ള കോലറയാറിൽ എത്തിച്ചേരുന്ന തുമ്പേൽ തോടിന്റെ ശുചീകരണ പ്രവർത്തനങ്ങൾക്ക് ഇന്ന് തുടക്കമാകും. രാവിലെ 8.30ന് ആലംതുരുത്തി ഭാഗത്തുള്ള കാരിക്കോട്ട് കലുങ്കിന്റെ സമീപത്ത് ബ്ലോക്ക്‌ പഞ്ചായത്ത് പ്രസിഡന്റ് അനു സി.കെ. ഉദ്ഘാടനം ചെയ്യും. ബ്ലോക്ക്‌ ഡിവിഷൻ മെമ്പർ അഡ്വ.വിജി നൈനാൻ അദ്ധ്യക്ഷത വഹിക്കും. തുമ്പേൽ തോടിന് നിലവിൽ രണ്ടര കിലോമീറ്റർ നീളവും നാലു മീറ്റർ വീതിയുമുണ്ട്. കഴിഞ്ഞ കുറെ വർഷക്കാലമായി ശുചീകരണ പ്രവർത്തനം നടക്കാത്തതിനാൽ മാലിന്യം കുമിഞ്ഞുകൂടി തോട്ടിലെ നീരൊഴുക്ക് നഷ്ടപ്പെട്ടു. ഈ തോട്ടിൽ നിന്നുള്ള മാലിന്യ ഉറവ സമീപ വീടുകളിലെ കിണറിലേക്ക് വ്യാപിച്ച് ആരോഗ്യപ്രശ്നങ്ങൾ നേരിടുകയാണ്. ഈ തോടിന്റെ ശുചീകരണ പ്രവർത്തനങ്ങൾ നടക്കാത്തതിനാൽ സമീപമുള്ള 50 ഓളം കുടുംബങ്ങളാണ് ശുദ്ധജലക്ഷാമം അനുഭവിക്കുന്നത്. ഇതേത്തുടർന്നാണ് ബ്ലോക്ക് പഞ്ചായത്തിന്റെ നീർച്ചാലുകളുടെ ശുചീകരണ പദ്ധതിയിൽ ഉൾപ്പെടുത്തി തോട് വൃത്തിയാക്കാൻ തീരുമാനിച്ചത്. 14 ലക്ഷം രൂപയാണ് ഇതിനായി അനുവദിച്ചത്.