കൊല്ലം: ബിവറേജസ് കോർപ്പറേഷനിൽ സർക്കാർ നടപ്പാക്കിയ ഗാലനേജ് ഫീക്കെതിരെ ഐ.എൻ.ടി.യു.സി, എ.ഐ.ടി.യു.സി സംയുക്ത സമരസമിതിയുടെ നേതൃത്വത്തിൽ കരിദിനാചരണം നടത്തി. ഗാലനേജ് ഫീ 5 പൈസയിൽ നിന്ന് ഒരു ലിറ്ററിന് 10 രൂപയായി വർദ്ധിപ്പിച്ച നടപടിയിലൂടെ കോർപ്പറേഷനെ വൻ നഷ്ടത്തിലേക്കാണ് സർക്കാർ തള്ളി വിട്ടിരിക്കുന്നത്. 2000 ഇരട്ടിയോളം വർദ്ധനവാണ് ഒരു ലിറ്റർ മദ്യത്തിന് മുകളിൽ ഈ ഗാലനേജ് ഫീ നടപ്പിലാക്കുന്നതിലൂടെ കോർപ്പറേഷന് നഷ്ടം സംഭവിക്കുന്നത്. കോർപ്പറേഷന്റെ നിലനിൽപ്പിനെ തന്നെ ബാധിക്കുന്ന ഈ ഉത്തരവിനെതിരെ സംയുക്ത സമരസമിതിയുടെ നേതൃത്വത്തിൽ കൊല്ലം വെയർ ഹൗസി​ന് മുന്നിൽ കരിദിനാചരണവും വിശദീകരണ യോഗവും നടത്തി. ബെവ്‌കോ എംപ്ലോയീസ് അസോസിയേഷൻ (ഐ.എൻ.ടി.യു.സി) സംസ്ഥാന സെക്രട്ടറി ജോസ് ആന്റണി ഉദ്ഘാടനം ചെയ്തു. സംയുക്ത സമര സമിതി കൊല്ലം ജില്ലാ ചെയർമാൻ ഉഗേഷ് കുമാർ അദ്ധ്യക്ഷത വഹി​ച്ചു. സ്റ്റാഫ് ഓർഗനൈസേഷൻ സംസ്ഥാന ജനറൽ സെക്രട്ടറി ആർ. രാഗേഷ്, എംപ്ലോയീസ് അസോസിയേഷൻ (എ.ഐ.ടി.യു.സി) കൊല്ലം ജില്ലാ സെക്രട്ടറി ഷഹനാസ്, എസ്. സിൽവർ, ദിനേശ് കുമാർ, മഹേന്ദ്രൻ, ആശ്രാമം സജീവ്, ബിജു, പ്രസീത, സജീവ് നെടുമൺകാവ്, സന്ദീപ്, അനിത, സിസ്‌ലി എന്നിവർ സംസാരിച്ചു.