ഗുരുവായൂർ: ശബരിമല സീസൺ കാലത്തെ ഗതാഗതക്കുരുക്ക് പരിഹരിക്കാൻ ദേവസ്വത്തിനും നഗരസഭയ്ക്കും നിർദ്ദേശങ്ങളുമായി മർച്ചന്റ്‌സ് അസോസിയേഷൻ. ഹൈക്കോടതി വിധിയുടെ പശ്ചാത്തലത്തിൽ കച്ചവട സ്ഥാപനങ്ങൾ ഇറക്കികെട്ടിയത് ദേവസ്വം അധികൃതർ നീക്കിയിരുന്നു. എന്നാൽ മഞ്ജുളാൽ വരെയുള്ള ദേവസ്വം റോഡ് വഴിയോര വ്യാപാരികൾ കൈയേറിയിരിക്കുകയാണ്. സന്ധ്യ മുതൽ രാവിലെ വരെ റോഡിലൂടെ നടന്നുപോകാൻ പോലും സാധിക്കാത്ത സ്ഥിതിയിലാണ് തെരുവ് കച്ചവടം. ഈ അനധികൃത വ്യാപാരം നിരോധിക്കുന്നതിന് ആവശ്യമായ നടപടി അധികൃതർ സ്വീകരിക്കണമെന്നും ദേവസ്വത്തിനും നഗരസഭയ്ക്കും നൽകിയ പരാതിയിൽ ജി.എം.എ പ്രസിഡന്റ് ടി.എൻ.മുരളി, ജനറൽ സെക്രട്ടറി റഹ്മാൻ തിരുനെല്ലൂർ എന്നിവർ ആവശ്യപ്പെട്ടു.

പ്രധാന നിർദ്ദേശങ്ങൾ

• നിർമ്മാണം നടന്നുവരുന്ന നഗരസഭ ബസ് സ്റ്റാൻഡിന്റെ പാർക്കിംഗ് ഭാഗം റൂട്ട് ബസുകൾക്ക് തുറന്ന് നൽകണം.
• ബസുകൾ സ്റ്റാൻഡിലേക്ക് മാറിയാൽ ബഹുനില പാർക്കിംഗ് സമുച്ചയം മറ്റ് വാഹനങ്ങളുടെ പാർക്കിംഗിന് ഉപയോഗിക്കാനാകും.
• ടൗൺഹാളിന് കിഴക്കുവശത്തുള്ള നഗരസഭ വക സ്ഥലം ടൂറിസ്റ്റ് ബസ് പാർക്കിംഗിന് ഉപയോഗപ്പെടുത്തണം.
• പടിഞ്ഞാറെനട മായ ബസ് സ്റ്റാൻഡിലെ മൺകൂന ഒഴിവാക്കി ഈ സ്ഥലം പൂർണമായും പാർക്കിംഗിന് പ്രയോജനപ്പെടുത്തണം.
• ദേവസ്വത്തിന്റെ മൾട്ടി ലെവൽ പാർക്കിംഗ് കേന്ദ്രത്തിൽ സെക്യൂരിറ്റി ജീവനക്കാരുടെ കുറവ് പറഞ്ഞ് പല നിലകളിലും പാർക്കിംഗ് ഒഴിവാക്കുന്ന രീതി മാറ്റണം.