കിളിമാനൂർ: അമിതഭാരവുമായി ക്വാറികളിൽ നിന്ന് പാറകളും മറ്റ് അനുബന്ധ സാധനങ്ങളുമായി ടിപ്പറുകളും, ടോറസും മിനിട്ടുകൾ ഇടവിട്ട് മരണപ്പാച്ചിൽ നടത്തുന്നത് അപകടഭീഷണിയാകുന്നു. തൊളിക്കുഴി - കുറവൻകുഴി റോഡിലാണ് രാത്രിയും പകലും വ്യത്യാസമില്ലാതെ ക്വാറികളിൽ നിന്ന് അനുവദനീയമായ ഭാരത്തിൽ കൂടുതൽ ലോഡുമായി ലോറികൾ പായുന്നത്. തൊളിക്കുഴി - കുറവുംകുഴി റോഡിന്റെ പുനർനിർമ്മാണം നടന്നുകൊണ്ടിരിക്കുകയാണ്. ഒരു വണ്ടിക്കുപോലും പോകാൻ സ്ഥലമില്ലാതെ റോഡ് നിർമ്മാണം നടക്കുമ്പോഴാണ് അമിത ഭാരവുമായി ടോറസുകൾ നിയന്ത്രണങ്ങൾ ലംഘിച്ചുകൊണ്ട് പായുന്നത്.

രക്ഷിതാക്കൾക്ക് ആശങ്ക

തൊളിക്കുഴി എൽ.പി.എസ്,അടയമൺ യു.പി.എസ്,അടയമൺ എൽ.പി സ്കൂളുകളിലേക്ക് വിദ്യാർത്ഥികളെ കാൽനടയായും അല്ലാതെയും വിടുന്നതിൽ പേടിച്ചിരിക്കുകയാണ് രക്ഷിതാക്കൾ. ഓട നിർമ്മാണത്തിന്റെ പണി നടക്കുന്നതിനാൽ ഒരു വാഹനം പോകുന്നതുതന്നെ പല സ്ഥലത്തും ഏറെ പ്രയാസപ്പെട്ടാണ്. വളവും തിരിവും ഏറെയുള്ള റോഡാണിത്.

പരാതി കേൾക്കുന്നില്ല

അമിതഭാരവും കയറ്റിയുള്ള ടോറസുകളുടെ ഈ റോഡിലൂടെയുള്ള യാത്ര കാരണമാണ് അടുത്തകാലത്തായി ആധുനിക രീതിയിൽ പണികഴിപ്പിച്ച റോഡ് ഇടിഞ്ഞുതാഴ്ന്ന് വീഴുന്നത്. ഇപ്പോൾ പുനർനിർമ്മാണം നടത്തേണ്ട അവസ്ഥയാണ്. നിരവധി തവണ പൊതുമരാമത്ത് വകുപ്പിനോടും മറ്റ് അധികാരികളോടും പരാതികൾ പറഞ്ഞിട്ടും യാതൊരു നടപടിയും സ്വീകരിച്ചിട്ടില്ല.

ഓടയുടെയും റോഡിന്റെയും പുനർനിർമ്മാണം നടന്നുകൊണ്ടിരിക്കുന്ന തൊളിക്കുഴി കുറവൻകുഴി റോഡിൽ അനുവദനീയമല്ലാത്ത ടോറസ് ഉൾപ്പെടെയുള്ള വാഹനങ്ങളാണ് കടന്നുപോകുന്നത്. ഒരുകാലത്ത് വയലായിരുന്ന പ്രദേശമാണിത്.എത്ര ആധുനികതയിൽ പണിതാലും അമിതഭാരവുമായി വാഹനങ്ങൾ കടന്നുപോയാൽ റോഡ് ഇനിയും തകരും.

എം.തമിമുദ്ദീൻ,അദ്ധ്യാപകൻ, സാമൂഹിക പ്രവർത്തകൻ