തിരുവനന്തപുരം: ഉപരാഷ്ട്രപതി സി.പി.രാധാകൃഷ്ണന്റെ സന്ദർശനത്തോടനുബന്ധിച്ച് നഗരത്തിൽ ഇന്ന് രാവിലെ 11 മുതൽ വൈകിട്ട് 6 വരെയും നാളെ രാവിലെ 8 മുതൽ വൈകിട്ട് 5.30 വരെയും ഗതാഗത നിയന്ത്രണം ഏർപ്പെടുത്തി.
ഇന്ന് ഉച്ചയ്ക്ക് 2 മുതൽ വൈകിട്ട് 6 വരെ ശംഖുംമുഖം ആൾസെയിന്റ്സ്-ചാക്ക–പേട്ട-പള്ളിമുക്ക്-പാറ്റൂർ-ജനറൽ ആശുപത്രി- ആശാൻ സ്‌ക്വയർ-രക്തസാക്ഷി മണ്ഡപം-മ്യൂസിയം-വെള്ളയമ്പലം-കവടിയാർ റോഡിന്റെ ഇരുവശങ്ങളിലും വാഹനങ്ങൾ പാർക്ക് ചെയ്യാൻ പാടില്ല.
നാളെ രാവിലെ 8 മുതൽ വൈകിട്ട് 5.30വരെ കവടിയാർ-വെള്ളയമ്പലം-മ്യൂസിയം-രക്തസാക്ഷി മണ്ഡപം-വി.ജെ.ടി-ആശാൻ സ്‌ക്വയർ-ജനറൽ ആശുപത്രി-പാറ്റൂർ-പേട്ട-ചാക്ക-ആൾസെയിന്റ്സ്-ശംഖുംമുഖം റോഡിന്റെ ഇരുവശങ്ങളിലും രാവിലെ 8 മുതൽ ഉച്ചയ്ക്ക് 12.30 വരെ പള്ളിമുക്ക്-കണ്ണമ്മൂല-കുമാരപുരം-മെഡിക്കൽകോളേജ് ഫ്‌ളൈഓവർ-ശ്രീചിത്ര-ആർ.സി.സി റോഡിന്റെ ഇരുവശങ്ങളിലും കണ്ണമ്മൂല-നാലുമുക്ക് റോഡിന്റെ ഇരുവശങ്ങളിലും വാഹനങ്ങൾ പാർക്ക് ചെയ്യാൻ അനുവദിക്കില്ല.
ഇന്നും നാളെയും ശംഖുംമുഖം-വലിയതുറ,പൊന്നറ,കല്ലുംമൂട്-ഈഞ്ചയ്ക്കൽ,അനന്തപുരി ആശുപത്രി-ഈഞ്ചയ്ക്കൽ-മിത്രാനന്ദപുരം-എസ്.പി.ഫോർട്ട്-ശ്രീകണ്‌ഠേശ്വരം പാർക്ക്-തകരപ്പറമ്പ് മേൽപ്പാലം-ചൂരക്കാട്ടുപാളയം-തമ്പാനൂർ ഫ്ലൈഓവർ- തൈക്കാട്-വഴുതക്കാട്-വെള്ളയമ്പലം-കവടിയാർ റോഡിലും നാളെ വെള്ളയമ്പലം-കവടിയാർ-കുറവൻകോണം-മരപ്പാലം-പട്ടം-പൊട്ടക്കുഴി-മുറിഞ്ഞപാലം-കുമാരപുരം-മെഡിക്കൽകോളേജ് ഫ്ലൈഓവർ- ശ്രീചിത്ര റോഡിലും നിയന്ത്രണങ്ങൾ ഏർപ്പെടുത്തി .
ഗതാഗത നിയന്ത്രണം ഏർപ്പെടുത്തിയിട്ടുള്ള പ്രധാന റോഡുകളിലും സമീപമുള്ള ഇടറോഡുകളിലും വാഹനങ്ങൾ പാർക്ക് ചെയ്യാൻ പാടില്ല.

പാർക്ക് ചെയ്യുന്ന വാഹനങ്ങളെ റിക്കവറി വാഹനം ഉപയോഗിച്ച് നീക്കംചെയ്യും. റൂട്ട് സമയത്ത് പ്രധാന റോഡിൽ വന്നുചേരുന്ന ഇടറോഡുകളിലെ വാഹന ഗതാഗതത്തിന് നിയന്ത്രണമേർപ്പെടുത്തുകയും ഗതാഗതം വഴിതിരിച്ചുവിടുകയും ചെയ്യും.
വിമാനത്താവളത്തിലേക്കും റെയിൽവേ സ്റ്റേഷനിലേക്കും വരുന്ന യാത്രക്കാർ മുൻകൂട്ടി യാത്രകൾ ക്രമീകരിക്കണം. ഡൊമസ്റ്റിക് എയർപോർട്ടിലേക്ക് പോകുന്ന യാത്രക്കാർ വെൺപാലവട്ടം,ചാക്ക ഫ്ലൈഓവർ,ഈഞ്ചക്കൽ കല്ലുംമൂട്,പൊന്നറ പാലം, വലിയതുറ വഴിയും ഇന്റർനാഷണൽ ടെർമിനലിലേക്ക് പോകുന്ന യാത്രക്കാർ വെൺപാലവട്ടം,ചാക്ക ഫ്ലൈഓവർ, ഈഞ്ചക്കൽ, കല്ലുംമ്മൂട് അനന്തപുരി ആശുപത്രി സർവീസ് റോഡ് വഴിയും പോകണം.