പാലോട്: തോട്ടിൽ മീൻപിടിക്കുന്നതിനിടെ വൈദ്യുതാഘാതമേറ്റ് യുവാവ് മരിച്ചു. കുറുന്താളി വടക്കേവിള ഷൈജുഭവനിൽ ഷൈജു (38) ആണ് മരിച്ചത്. തോടിന് സമീപത്തുനിന്ന തെങ്ങ് കാറ്റിൽ വീഴാതിരിക്കാൻ കെട്ടിയ കമ്പി തോടിന് എതിർവശത്തുള്ള മറ്റൊരു മരവുമായി ബന്ധിപ്പിച്ചിരുന്നു. ഈ കമ്പി ദ്രവിച്ച് പൊട്ടി വൈദ്യുതി കമ്പിക്ക് മുകളിൽ കൂടി തോട്ടിലേക്ക് വീണു കിടക്കുകയായിരുന്നു. ഈ കമ്പിയിൽ വൈദ്യുതി ഉണ്ടെന്നറിയാതെ മീൻ പിടിക്കാനെത്തിയ ഷൈജുവിന് ഷോക്കേൽക്കുകയായിരുന്നു. സംഭവ സ്ഥലത്തു വച്ച് തന്നെ ഷൈജു മരിച്ചു. പ്ലാവറയിലെ ഹെഡ് ലോഡ് തൊഴിലാളിയാണ് ഷൈജു. ഭാര്യ: ദീപ്തി. മക്കൾ: ദീപക്,ദീപിക. മൃതദേഹം മെഡിക്കൽ കോളേജ് ആശുപത്രി മോർച്ചറിയിൽ.