പാലോട്: മുതുവിള-ചെല്ലഞ്ചി-നന്ദിയോട് റോഡിൽ പരപ്പിൽ മുതൽ ചെല്ലഞ്ചി പാലം വരെയുടെ റോഡ് നിർമ്മാണം അവസാന ഘട്ടത്തിൽ. റോഡ് നിർമ്മാണത്തിന് പ്രതിസന്ധിയായിരുന്ന സ്ഥലപരിമിതി പരിഹരിക്കാൻ നാട്ടുകാരുടെ ഇടപെടലിൽ റോഡിന്റെ ഇരുവശങ്ങളിൽ നിന്ന് ഒരു മീറ്റർ വീതം സ്ഥലം സൗജന്യമായി വിട്ടുകൊടുത്തിരുന്നു. ആവശ്യമായ ഭാഗങ്ങളിൽ സംരക്ഷണഭിത്തി കെട്ടുന്നതിനാവശ്യമായ നടപടികൾ സ്വീകരിക്കാമെന്ന് കരാറുകാർ ഉറപ്പു നൽകിയിട്ടുണ്ട്.ഇതോടെ കഷ്ടിച്ച് ഒരു വാഹനം മാത്രം കടന്നു പോകാനുള്ള സൗകര്യം മാത്രമുണ്ടായിരുന്ന ഈ ഭാഗത്ത് ഗതാഗതം സുഗമമായി നടക്കും. മുതുവിള - ചെല്ലഞ്ചി - പാലുവള്ളി - നന്ദിയോട് 13.5 കിലോമീറ്റർ നീളം വരുന്ന റോഡ് ബി.എം.ബി.സി നിലവാരത്തിലാണ് നിർമ്മിക്കുന്നത്. 13.45 കോടി രൂപയാണ് നിർമ്മാണ ചിലവ്. ഇതോടൊപ്പം ആറാംതാനം-വെള്ളുമണ്ണടി റോഡിന്റെ ബി.സി ഓവർലേയുടെ പ്രവൃത്തിയും ആരംഭിച്ചു. ഒരു വർഷമാണ് നിർമ്മാണ കാലാവധി. അതേസമയം, റോഡ് നിർമ്മാണം നടന്ന സ്ഥലത്ത് നിന്ന വൈദ്യുത പോസ്റ്റുകൾ മാറ്റാതെയാണ് ടാറിംഗ് പൂർത്തിയാക്കിയത്. അതിനാൽ റോഡിന്റെ നടുക്കാണ് ഇപ്പോൾ പോസ്റ്റ് സ്ഥിതിചെയ്യുന്നത്.