കൊച്ചിയിൽ കണ്ടെത്തിയ അജ്ഞാത മൃതദേഹം സൂരജ് ലാമയുടേതെന്ന് സംശയം; ദുരൂഹത നീക്കാൻ ശാസ്ത്രീയ പരിശോധന

കൊച്ചി: കുവൈറ്റ് വിഷമദ്യ ദുരന്തത്തിൽ നാടു കടത്തപ്പെട്ട സൂരജ് ലാമ മരിച്ചതായി സംശയം. കളമശ്ശേരി എച്ച് എംടിയ്ക്ക് സമീപമാണ് സൂരജ് ലാമയുടേതെന്ന്(58) സംശയിക്കുന്ന മൃതദേഹം കണ്ടെത്തിയത്. വിഷമദ്യ ദുരന്തത്തിൽ ഓ‌ർമ്മ നഷ്ടപ്പെട്ട ലാമയെ കുവൈറ്റ് അധികൃതർ‌ കൊച്ചിയിലേക്ക് നാടുകടത്തുകയായിരുന്നു. എന്നാൽ നാടുകടത്തിയ കാര്യം ലാമയുടെ കുടുംബത്തെ അധികൃത‌ർ‌ അറിയിച്ചിരുന്നില്ല. ഓർമ്മ ശക്തി നഷ്ടപ്പെട്ട ആളായതിനാൽ നെടുമ്പാശ്ശേരിയിൽ വിമാനം ഇറങ്ങിയ ലാമ പിന്നീട് വിമാനത്താവളത്തിന്റെ പരിസരത്തും തൃക്കാക്കര പരിസരത്തുമൊക്കെ അലഞ്ഞു നടക്കുകയായിരുന്നു. ഈ സമയത്ത് ലാമയെ ഒക്ടോബർ എട്ടിന് തൃക്കാക്കര പൊലീസ് കണ്ടെത്തുകയും തുടർന്ന് അദ്ദേഹത്തെ കളമശ്ശേരി മെഡിക്കൽ കോളേജിൽ പ്രവേശിപ്പിക്കുകയും ചെയ്തിരുന്നു.

ലാമ നാട്ടിൽ ഉണ്ടെന്ന വിവരം പൊലീസാണ് കുടുംബത്തെ അറിയിച്ചത്. എന്നാൽ അദ്ദേഹത്തിന്റെ കുടുംബം അവിടെ എത്തുമ്പോഴേക്കും ലാമ ആശുപത്രിയിൽ നിന്നും പൊയിരുന്നു. ഓർമ്മശക്തി നഷ്ടപ്പെട്ട ഒരാളെ ആശുപത്രിയിൽ പ്രവേശിപ്പിച്ചിട്ടു പോലും അധികൃതരിൽ നിന്നും പോലും അദ്ദേഹത്തിന് കാര്യമായ പരിഗണന കിട്ടിയിരുന്നില്ലെന്ന വിമ‌ർശനങ്ങൾ ഉയർന്നിരുന്നു.

ഒക്ടോബർ‌ പത്തിനാണ് കളമശ്ശേരി ആശുപത്രിക്ക് അടുത്തുള്ള സിസിടിവിയിൽ നിന്ന് ലാമയുടെ ദൃശ്യങ്ങൾ കിട്ടുന്നത്. പിന്നീട് അദ്ദേഹത്തിന്റെ കുടുംബം ഇവിടെയെത്തി ലാമയ്ക്കു വേണ്ടിയുള്ള അന്വേഷണം നടത്തുകയും നെടുമ്പാശ്ശേരി പൊലീസിൽ പരാതി നൽകുകയും ചെയ്തു. എന്നാൽ നൽകിയ പരാതിയിൽ അന്വേഷണമൊന്നും നടക്കാതെ വന്നപ്പോൾ ഹൈക്കോടതിയെ ഹേബിയസ് കോർപ്പസ് ഹ‌ർജിയുമായി ലാമയുടെ മകൻ സാന്റൻ ലാമ സമീപിച്ചു. വിഷയത്തെ വളരെ ഗൗരവമായി തന്നെ ഹൈക്കോടതി പരിഗണിക്കുകയും സംസ്ഥാന സാമൂഹ്യനീതി വകുപ്പിനെ കക്ഷി ചേ‌ർത്ത് പ്രത്യേക അന്വേഷണ സംഘത്തെ രൂപം നൽകണമെന്ന് നി‌ർദ്ദേശിക്കുകയും ചെയ്തു.

ഹൈക്കോടതി നിർദ്ദശപ്രകാരം ആലുവ എഎസ്പിയുടെ നേതൃത്വത്തിൽ അന്വേഷണം നടത്തുന്നതിനിടയിലാണ് ഇന്ന് രാവിലെ കളമശ്ശേരി എച്ച് എംടിക്ക് സമീപത്തുള്ള ആളൊഴിഞ്ഞ ഭാഗത്ത് കാട്ടിനുള്ളിൽ ലാമയുടേതെന്ന് സംശയിക്കുന്ന മൃതദേഹം കണ്ടെത്തിയത്. പ്രത്യേക അന്വഷണ സംഘത്തിന്റെ ഭാഗമായി അഗ്നിരക്ഷാസേനാംഗങ്ങളെയും നിയോഗിച്ചിരുന്നു. മൃതദേഹം അഴുകിയ നിലയിലായതിനാൽ ശാസ്ത്രീയ പരിശോധനകൾക്ക് ശേഷം മാത്രമേ മൃതദേഹം ലാമയുടേതാണോയെന്ന് ഉറപ്പിക്കാൻ കഴിയുകയുള്ളൂ.