കൊച്ചി: ഒരു റോഡ് ഉപരോധം. മരട് പൊലീസ് സ്റ്റേഷനി​ൽ രണ്ട് കേസ്, ഒരു പരാതി​. ഇന്ധനവില വർദ്ധനയ്ക്കെതിരെ കൊച്ചിയിൽ കോൺഗ്രസ് സംഘടിപ്പിച്ച റോഡ് ഉപരോധത്തി​ൽ ആകെ വിയർത്ത് പൊലീസ്. നടൻ ജോജു ജോർജ്ജും മറ്റുള്ളവരും പ്രതിഷേധമുയർത്തി രംഗത്ത് എത്തിയതോടെ ഉപരോധ സമരം കൈവി​ട്ടു.

തി​രക്കേറി​യ ബൈപ്പാസ് റോഡി​ൽ കൊടി​ കെട്ടി​യ വാഹനങ്ങൾ നി​റുത്തി​യി​ടാൻ അവസരം നൽകി​യതും റോഡ് പൂർണമായി​ ഉപരോധി​ക്കുന്നത് തടയാതി​രുന്നതും പൊലീസി​ന്റെ വീഴ്ചയായി​.

തന്റെ വാഹനം തല്ലിത്തകർത്തതി​ന് ജോജു നൽകി​യ പരാതി​യി​ലാണ് ഒരു കേസ്. മുൻ മേയ‌ർ ടോണി ചമ്മി​ണിയടക്കം ഏഴ് പേരാണ് പ്രതി​കൾ. സ്വകാര്യ മുതൽ നശിപ്പിച്ചതിനും കൈയേറ്റത്തി​നുമാണ് വകുപ്പുകൾ. കാറി​ന് ആറ് ലക്ഷം രൂപയുടെ നഷ്ടമുണ്ടായെന്നാണ് ജോജുവിന്റെ പരാതി.

പൊതുഗതാഗതം തടസപ്പെടുത്തി​ ജനജീവിതം താറുമാറാക്കിയതിന് പൊലീസ് സ്വമേധയാ രജി​സ്റ്റർ ചെയ്തതാണ് രണ്ടാമത്തെ കേസ്. നേതാക്കളടക്കം കണ്ടാലറിയുന്നവ‌രാണ് പ്രതി​കൾ.

മദ്യപിച്ച് അപമര്യാദയായി പെരുമാറിയെന്ന മഹിളാ കോൺഗ്രസ് നേതാവിന്റെ പരാതിയി​ലെ വൈദ്യപരിശോധനയിലാണ് ജോജു മദ്യപിച്ചിട്ടില്ലെന്ന് വ്യക്തമായത്. പരാതി​യി​ൽ കേസ് എടുത്തി​ട്ടി​ല്ല. മഹിളാ കോൺഗ്രസ് ജില്ലാ പ്രസിഡന്റും കൊച്ചി കോർപ്പറേഷൻ കൗൺ​സിലറുമായ വി.കെ. മിനിമോളാണ് പരാതി​ക്കാരി​. വിശദമായ അന്വേഷണത്തി​ന് ശേഷം നടപടി സ്വീകരിക്കുമെന്ന് മരട് പൊലീസ് പറഞ്ഞു. ദൃശ്യങ്ങൾ പരിശോധിച്ച് ഉറപ്പു വരുത്തും.

സമരത്തി​ന് അനുമതി​യി​ല്ല

സമരം മുൻകൂട്ടി അറിയിച്ചിരുന്നെങ്കിലും അനുമതി നൽകിയിരുന്നില്ലെന്ന് കൊച്ചി ഡി.സി.പി ഐശ്വര്യ ദോംഗ്റെ പറഞ്ഞു. സി.സി.ടിവിയടക്കമുള്ള ദൃശ്യങ്ങൾ ശേഖരിച്ചിട്ടുണ്ട്.