മേയർ ബസ് ത‌ടഞ്ഞ സംഭവം: വക്കീൽ നോട്ടീസയച്ച് ഡ്രൈവർ

തിരുവനന്തപുരം : മേയർ ആര്യ രാജേന്ദ്രൻ കെ.എസ്.ആർ.ടി.സി ബസ് തടഞ്ഞു നിറുത്തിയ സംഭവത്തിൽ അന്വേഷണം ശരിയായ ദിശയിൽ നടന്നില്ലെന്നു ചൂണ്ടിക്കാട്ടി സർക്കാരിനും പൊലീസിനും വക്കീൽ നോട്ടിസയച്ച് ബസിന്റെ ഡ്രൈവറായിരുന്ന എൽ.എച്ച്.യദു.

ചീഫ് സെക്രട്ടറി, ആഭ്യന്തര സെക്രട്ടറി, സംസ്ഥാന പൊലീസ് മേധാവി, കന്റോൺമെന്റ് എസ്‌.ഐ എന്നിവർക്കാണ് അഭിഭാഷകൻ അശോക് പി.നായർ വഴി നോട്ടിസയച്ചത്. കോടതി നിർദേശ പ്രകാരം നടത്തിയ അന്വേഷണം രാഷ്ട്രീയ സ്വാധീനത്തിനു വഴങ്ങി അട്ടിമറിക്കപ്പെട്ടു. മേയർ ആര്യാ രാജേന്ദ്രനെയും ഭർത്താവ് സച്ചിൻ ദേവ് എംഎൽഎയെയും കുറ്റവിമുക്തരാക്കി റിപ്പോർട്ട് നൽകിയ നടപടി നീതിയുക്തമല്ല. 15 ദിവസത്തിനുള്ളിൽ ഒരു ലക്ഷം രൂപ നഷ്ടപരിഹാരം നൽകിയില്ലെങ്കിൽ വീണ്ടും കോടതിയെ സമീപിക്കുമെന്നും നോട്ടിസിൽ പറയുന്നു.