പ്രശസ്ത ശില്‌പി സാബു  ജോസഫ് അന്തരിച്ചു; വിടപറഞ്ഞത് രാഷ്ട്രീയ ആചാര്യന്മാരുടെ പ്രതിമകൾ തീർത്ത പ്രതിഭ

കോട്ടയം: പ്രശസ്ത ശില്‌പി കാഞ്ഞിരപ്പള്ളി കരിപ്പാറപറമ്പിൽ സാബു ജോസഫ് (77) അന്തരിച്ചു. തിരുവനന്തപുരത്ത് വച്ചായിരുന്നു അന്ത്യം. കാഞ്ഞിരപ്പള്ളി കരിപ്പാറപറമ്പിൽ പരേതരായ കെ സി ജോസഫ് - അച്ചാമ്മ ദമ്പതികളുടെ മകനാണ്. ഷെവലിയർ ആർട്ടിസ്റ്റ് പി ജെ ചെറിയാന്റെ ചെറുമകനും സ്വാതന്ത്ര്യ സമരസേനാനികളായ അക്കാമ്മ ചെറിയാന്റെയും റോസമ്മ പുന്നൂസിന്റെയും സഹോദര പുത്രനാണ്. പ്രമുഖ ചലച്ചിത്ര ഛായാഗ്രാഹകൻ സാലൂ ജോർജ് സഹോദരനാണ്. സംസ്കാരം പിന്നീട്.

കേരളത്തിലെ ഒട്ടുമിക്ക രാഷ്ട്രീയ നേതാക്കളുടെയും പ്രതിമ തീർത്തത് സാബുവാണ്. തിരുവനന്തപുരത്തെ സി കേശവൻ, അക്കാമ്മ ചെറിയാൻ, മുവാറ്റുപുഴയിലെ കെ എം ജോർജ്. കോട്ടയം നഗരത്തിലെ പിടി ചാക്കോ, ബെഞ്ചിമൻ ബെയ്ലി തുടങ്ങിവരുടെ പ്രതിമകൾ സാബുവിന്റെ സൃഷ്ടികളാണ്.

വിശുദ്ധ അൽഫോൻസാമ്മ, വാഴ്ത്തപ്പെട്ട തേവർപറമ്പിൽ കുഞ്ഞച്ചൻ, കർദിനാൾ ജോസഫ് പാറേക്കാട്ടിൽ, കോട്ടയ്ക്കൽ ആര്യവെെദ്യശാല വെെദ്യരത്നം പി എസ് വാര്യർ, ചലച്ചിത്ര സംവിധായകൻ കുഞ്ചാക്കോ, കോട്ടയം രൂപത മുൻ ബിഷപ്പ് മാർ തോമസ് തറയിൽ, കട്ടക്കയത്തിൽ ചെറിയാൻ മാപ്പിള, കാഞ്ഞിരപ്പള്ളി എകെജെഎം സ്കൂളിലെ ഈശോസഭ സ്താപകൻ വിശുദ്ധ ഇഗ്നേഷ്യസ് ലയോള തുടങ്ങിയ പ്രതിമകളും തീർത്തിട്ടുണ്ട്.

കാഞ്ഞിരപ്പള്ളി എകെജെഎം സ്കൂൾ, തുമ്പ സെന്റ് സേവ്യേഴ്സ് കോളജ്, മദ്രാസ് കോളേജ് ഓഫ് ആർട്ട്സ് ആൻഡ് ക്രാഫ്റ്റ്സ് എന്നിവിടങ്ങളിൽ വിദ്യാഭ്യാസം പൂർത്തിയാക്കി. ശിൽപകലയിൽ മദ്രാസ് കോളേജ് ഓഫ് ആർട്സ് ആൻഡ് ക്രാഫ്റ്റ്സിൽ നിന്ന് അ‌ഞ്ചുവർഷത്തെ ഡിപ്ലോമ ആൻഡ് പോസ്റ്റ് ഡിപ്ലോമ കോഴ്സ് പഠനമികവിന്റെ ആനൂകൂല്യത്തിൽ നാലുവർഷം കൊണ്ട് സാബു പൂർത്തിയാക്കി.

ഭാര്യ: കാഞ്ഞിരപ്പള്ളി കടമപ്പുഴ ഫാറ്റിമ. മക്കൾ: ആൻ ട്രീസ അൽഫോൻസ്, റോസ്‌മേരി അന്റണി, ലിസ് മരിയ സാബു. മരുമക്കൾ: പ്രവീൺ അൽഫോൻസ് ജോൺ പിട്ടാപ്പള്ളി, ആന്റണി ജോസ് കോണിക്കര.