പഠന കാലത്തും സംരംഭകരായി വിജയം നേടാം

കേരളത്തിൽ വിദ്യാർത്ഥികൾക്ക് “ജോലി അന്വേഷിക്കുന്നവർ” എന്നതിൽ നിന്ന് “ജോലി സൃഷ്ടിക്കുന്നവർ” എന്ന നിലയിലേക്ക് മാറാൻ ഇന്ന് ശക്തമായ അവസരങ്ങളാണുള്ളത്. സംസ്ഥാന സർക്കാരിന്റെ വിവിധ ഏജൻസികൾ ചേർന്നൊരുക്കിയ സംരംഭക ഇക്കോസിസ്റ്റം ആശയത്തിൽ നിന്ന് വിപണിവരെ വിദ്യാർത്ഥികളെ കൈപിടിച്ചു നയിക്കുന്നു. Kerala Startup Mission (KSUM) കോളേജ് ക്യാമ്പസുകളിലെ IEDC മുഖേന ആശയ വികസനം, മെന്ററിംഗ്, പ്രോട്ടോടൈപ്പ് ഗ്രാന്റ്, സീഡ് ഫണ്ടിംഗ് എന്നിവ നൽകുന്നു. ഹാക്കത്തോൺ, ബൂട്ട്‌ക്യാമ്പ്, ഇൻക്യൂബേഷൻ എന്നിവ വഴി സ്റ്റാർട്ടപ്പാക്കി മാറ്റാനുള്ള എല്ലാ ഘട്ടങ്ങളിലും പിന്തുണ ഉറപ്പാക്കുന്നു. Kerala Financial Corporation (KFC) യുവ സംരംഭകർക്ക് പ്രത്യേക വായ്പാ പദ്ധതികൾ, സ്റ്റാർട്ടപ്പ് ലോൺ, മാർജിൻ മണി സഹായം തുടങ്ങിയ സാമ്പത്തിക കരുത്ത് നൽകുന്നു; കുറഞ്ഞ പലിശയും ഇളവുകളും വിദ്യാർത്ഥികൾക്ക് ആത്മവിശ്വാസം പകരുന്നു. നിർമ്മാണ-ടെക് സംരംഭങ്ങൾക്ക് അടിസ്ഥാന സൗകര്യവും മാർഗനിർദ്ദേശവും ഒരുക്കുന്നത് Kerala State Industrial Development Corporation (KSIDC) ആണ്; വ്യവസായ പാർക്കുകൾ , ഇൻഫ്രാസ്ട്രക്ചർ വികസനം തുടങ്ങിയവ വഴി ഒരു ആശയത്തെ ഉത്പന്നമാക്കാൻ ഭൗതിക വേദി നൽകുന്നു. എം.എസ്.എം.ഇ മേഖലയിലെ പരിശീലനങ്ങൾ, പ്രോജക്ട് റിപ്പോർട്ട് തയ്യാറാക്കൽ, സബ്സിഡി മാർഗനിർദ്ദേശം എന്നിവ MSME Development Institute വഴിയും ലഭ്യമാകുന്നു. ഇതിന് പുറമെ കോളേജ് ഇൻക്യൂബേറ്ററുകൾ, ടെക്നോപാർക്ക്-സ്റ്റാർട്ടപ്പ് ബന്ധങ്ങൾ, വനിതാ സംരംഭകർക്കുള്ള പ്രത്യേക പദ്ധതികൾ എന്നിവയും സജീവമാണ്. ആശയത്തിന് മൂലധനം, മെന്ററിംഗ്, മാർക്കറ്റ് ലിങ്കേജ്—ഈ മൂന്നു ഘടകങ്ങളും ഒരുമിച്ച് ചേർന്ന പിന്തുണയാണ് കേരളത്തിലെ വിദ്യാർത്ഥികൾക്ക് ലഭിക്കുന്നത്. ഡിഗ്രിയോടൊപ്പം ബിസിനസ് ആശയവും വളർത്തി സർക്കാർ ഒരുക്കിയ വേദികൾ പ്രയോജനപ്പെടുത്തുമ്പോൾ, ജോലി തേടുന്ന തലമുറയിൽ നിന്ന് ജോലി സൃഷ്ടിക്കുന്ന തലമുറയിലേക്ക് ആത്മവിശ്വാസത്തോടെ വളരാം.

പഠനവും സംരംഭവും ഒരുമിച്ച് സാദ്ധ്യമോ?
പഠിക്കുമ്പോഴേ സംരംഭം തുടങ്ങുന്നത് പഠനത്തെ ബാധിക്കുമോ എന്ന ആശങ്ക സ്വാഭാവികമാണ്. പല മാതാപിതാക്കൾക്കും “ആദ്യം ജോലി, ശേഷം ബിസിനസ്” എന്ന ധാരണ ശക്തമാണ്. പക്ഷേ ഇന്നത്തെ ക്യാമ്പസ് ഇക്കോസിസ്റ്റം പഠനത്തോടൊപ്പം ചെറിയ തോതിൽ സംരംഭപരിശീലനം നേടാനുള്ള അവസരമാണ് നൽകുന്നത്. ആഴ്ചയിൽ കുറച്ച് മണിക്കൂറുകൾ ആശയ വികസനം, പ്രോട്ടോടൈപ്പ് പരീക്ഷണം, മാർക്കറ്റ് സ്റ്റഡി എന്നിവയ്ക്ക് മാറ്റിവയ്ക്കുന്നത് പഠനത്തെ ബാധിക്കുന്നതല്ല; മറിച്ച് ക്ലാസ്‌റൂമിൽ പഠിക്കുന്ന സിദ്ധാന്തങ്ങൾക്ക് പ്രായോഗിക അർത്ഥം നൽകുന്നതാണ്. സമയനിയന്ത്രണം, ടീമ്വർക്ക്സ്, പ്രശ്നപരിഹാരശേഷി, സാമ്പത്തിക ശാസ്ത്രം എന്നിവ വിദ്യാർത്ഥി നേരിൽ അനുഭവിക്കുന്നു. പരാജയം വന്നാലും അത് വലിയ നഷ്ടമല്ല—പഠനകാലത്തെ പാഠമാണ്. വിജയം കണ്ടാൽ പഠനം പൂർത്തിയാകുമ്പോഴേക്കും വരുമാനമാർഗം സൃഷ്ടിക്കാം. അതിനാൽ സംരംഭം പഠനത്തിന്റെ ശത്രുവല്ല; പഠനത്തെ കൂടുതൽ പ്രസക്തമാക്കുന്ന അനുഭവപാഠമാണ്.

(​പേ​ഴ്‌​സ​ണ​ൽ​ ​ഫി​നാ​ൻ​സ് ​അ​ന​ലി​സ്‌​റ്റും​ ​ഓ​ൺ​ട്ര​പ്ര​ണ​ർ​ഷി​പ്പ് ​മെ​ന്റ​റു​മാ​ണ് ​ലേ​ഖ​ക​ൻ.​ ​ഇ​മെ​യി​ൽ​j​a​y​a​k​u​m​a​r​k​k8​@​g​m​a​i​l.​c​o​m)