കോലഞ്ചേരി: ബി.പി.സി.എൽ ഭൂമി ഏ​റ്റെടുപ്പ് സംബന്ധിച്ച പ്രശ്‌നങ്ങൾ പരിഹരിക്കാൻ ഭൂവുടമകളുടെ യോഗം വിളിക്കുമെന്ന് റവന്യൂ മന്ത്രി കെ.രാജൻ പറഞ്ഞു. നിയമസഭയിൽ അഡ്വ. പി.വി. ശ്രീനിജിൻ എം.എൽ.എയുടെ ശ്രദ്ധ ക്ഷണിക്കലിന് മറുപടി നൽകുകയായിരുന്നു മന്ത്രി. ബി.പി.സി.എല്ലിന്റെ അശാസ്ത്രീയ ഭൂമി ഏ​റ്റെടുക്കൽ മൂലം തിരുവാണിയൂർ, പുത്തൻകുരിശ് പഞ്ചായത്തുകളിലെ നിരവധി ഭൂവുടമകൾ പ്രതിസന്ധിയിലാണെന്ന് എം.എൽ.എ ചൂണ്ടിക്കാട്ടി. പദ്ധതി പ്രദേശത്തോട് ചേർന്ന് കിടക്കുന്നതിനാൽ മലിനീകരണമടക്കമുള്ള ഗുരുതര പ്രശ്‌നങ്ങളാണ് ഭൂവുടമകൾ നേരിടുന്നത്. ഭൂമി വിട്ടു നൽകാൻ ഇവർ തയ്യാറാണെങ്കിലും മതിപ്പു വില നൽകി ഏ​റ്റെടുക്കാൻ കമ്പനിയധികൃതർ തയ്യാറാകുന്നില്ലെന്നും ഇക്കാര്യത്തിൽ സർക്കാർ ഇടപെടൽ വേണമെന്നുമായിരുന്നു ആവശ്യം.