തലശ്ശേരി: നഗരസഭ തിരുവങ്ങാട് വാർഡ് വികസന സമിതിയുടെ നേതൃത്വത്തിൽ പൊതു പരീക്ഷകളിൽ ഉന്നത വിജയം കൈവരിച്ച വിദ്യാർത്ഥികളെയും കൊവിഡിൽ സ്വന്തം ജീവൻ പോലും മറന്ന് ജനങ്ങളിൽ ഇറങ്ങിച്ചെന്ന് ത്യാഗപൂർണ്ണമായ സേവനം നടത്തിയ സന്നദ്ധ പ്രവർത്തകരെയും ആശാവർക്കർമാരെയും തുച്ഛമായ വരുമാനത്തിൽ ജോലി ചെയ്യുന്ന തൊഴിലുറപ്പു തൊഴിലാളികളെയും ആദരിച്ചു. മതസൗഹാർദ്ദത്തിന് മാതൃകയായ സുബൈദയെയും ചടങ്ങിൽ ആദരിച്ചു.
നഗരസഭ സ്റ്റാൻഡിംഗ് കമ്മിറ്റി സ്ഥിരംസമിതി ചെയർപേഴ്സൺ എൻ. രേഷ്മയുടെ അദ്ധ്യക്ഷതയിൽ മുൻ എക്‌സൈസ് ജോയിന്റ് കമ്മിഷണർ പി.കെ. സുരേഷ് ഉദ്ഘാടനം ചെയ്തു. ഐ.എം.എ തലശ്ശേരി ശാഖ സെക്രട്ടറി ഡോ. നദീം അബൂട്ടി വിശിഷ്ടാതിഥിയായി. എം. പ്രേമാനന്ദ്, എൻ. രതിക, എൻ.സി. ബാലൻ സംസാരിച്ചു. വികസന സമിതി അംഗം റയ്യാൻ റഫീക്ക് സ്വാഗതവും വാർഡ് കൺവീനർ നിഷാന്ത് നന്ദിയും പറഞ്ഞു.