കോട്ടക്കൽ: വാടകമുറി ഒഴിയാൻ പറഞ്ഞതിന്റെ പേരിൽ കെട്ടിട ഉടമയെ മണ്ണെണ്ണ ഒഴിച്ച് തീകൊളുത്തി കൊല്ലാൻ ശ്രമിച്ചെന്നു പരാതി. സംഭവത്തിൽ കോട്ടയ്ക്കൽ നായാടിപ്പാറ കമ്മാടൻ പ്രകാശനെ (50) പൊലീസ് അറസ്റ്റ് ചെയ്തു.കെട്ടിട ഉടമ പരവക്കൽ ഇസ്മായിലിന്റെ പരാതിയിലാണ് അറസ്റ്റ്. ആര്യവൈദ്യശാല റോഡിൽ ജി.യു.പി സ്‌കൂളിന് എതിർവശം ഇസ്മായിലിന്റെ കെട്ടിടത്തിൽ ഇലക്ട്രിക്കൽ, ഇലക്ട്രോണിക്സ് റിപ്പയർ കട നടത്തുകയാണ് പ്രകാശൻ. കഴിഞ്ഞ ദിവസമാണ് കേസിനാസ്പദമായ സംഭവം. വാടകമുറി ഒഴിയാനാവശ്യപ്പെട്ട് 3 മാസമായെങ്കിലും ഇയാൾ കടമുറി ഒഴിവാക്കി സാധനങ്ങൾ കൊണ്ടു പോകാത്തതിനെ ചൊല്ലി ഇരുവരും തമ്മിൽ വാക്കേറ്റമുണ്ടായി. പ്രകാശൻ ഈ സമയം കൈയിൽ കരുതിയ മണ്ണെണ്ണ ഇയാളുടെ ശരീരത്തിലേക്ക് ഒഴിച്ച് തീ കൊളുത്താൻ ശ്രമിച്ചെന്നാണ് കേസ്.