വടക്കഞ്ചേരി: ആലത്തൂർ വനം റേഞ്ച് വടക്കഞ്ചേരി സെക്ഷനു കീഴിലെ വീഴ്മല വനത്തിൽ നിന്ന് ചന്ദനമരം മുറിച്ചു കടത്താൻ ശ്രമിച്ച മൂന്ന് പേർ അറസ്റ്റിൽ. സേലം ആത്തൂർ സ്വദേശികളായ ലക്ഷ്മണൻ(42), അശോക് കുമാർ (20), ശരത്കുമാർ(23) എന്നിവരാണ് അറസ്റ്റിലായത്. വനംവകുപ്പ് അധികൃതർ വ്യാഴാഴ്ച രാത്രി വനമേഖലയിൽ പരിശോധന നടത്തുന്നതിനിടെ പ്രതികളെ കൈയോടെ പിടികൂടുകയായിരുന്നു. ഇവരിൽ നിന്ന് 34 കിലോഗ്രാം ചന്ദനമര കഷണങ്ങൾ, മുറിക്കാൻ ഉപയോഗിച്ച ആയുധങ്ങൾ തുടങ്ങിയവ പിടിച്ചെടുത്തു.
വീഴ്മലയിൽ ഇടയ്ക്കിടെ ചന്ദനമരങ്ങൾ മോഷണം പോകുന്നതിന്റെ പശ്ചാത്തലത്തിൽ വനംവകുപ്പ് പരിശോധന ശക്തമാക്കിയിരുന്നു. ആലത്തൂർ റേഞ്ച് ഓഫീസർ കെ.ആർ. കൃഷ്ണദാസ്, സെക്ഷൻ ഫോറസ്റ്റ് ഓഫീസർ എ.സലീം, ബീറ്റ് ഫോറസ്റ്റ് ഓഫീസർമാരായ യു. സുരേഷ്ബാബു, നിഖിൽകുമാർ, എൻ.സി അനു, വാച്ചർമാരായ പ്രകാശൻ, തങ്കമണി, ഗിന്നസ് തുടങ്ങിയവരുടെ നേതൃത്വത്തിലായിരുന്നു പരിശോധന. പ്രതികളെ ആലത്തൂർ കോടതിയിൽ ഹാജരാക്കി റിമാൻഡ് ചെയ്തു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |