മാള: അസാധാരണ കാലഘട്ടത്തിൽ ആരാധനാലയങ്ങളിൽ സൂക്തങ്ങളായി മുഴങ്ങുകയാണ് കൊവിഡ് പ്രതിരോധ ജാഗ്രതാ സന്ദേശം. മാളയ്ക്കടുത്തുള്ള പൂപ്പത്തി സ്വദേശിയായ പൊയ്യ പഞ്ചായത്ത് അസിസ്റ്റന്റ് സെക്രട്ടറി സുജന്റെ ഗാനമാണ് വിവിധ ആരാധനാലയങ്ങൾ ഉച്ചഭാഷിണിയിലൂടെ കേൾപ്പിക്കാൻ തുടങ്ങിയത്.
പി.കെ സുജൻ രചനയും സംവിധാനവും നിർവ്വഹിച്ച് പാടിയ ഈ നാലര മിനിറ്റ് ദൈർഘ്യമുള്ള ദൃശ്യങ്ങളങ്ങുന്ന ഗാനത്തിന്റെ സംഗീതം അനിൽ മാളയും ചിത്ര സംയോജനവും എഡിറ്റിംഗും ശ്രീകുമാർ ചൈതന്യയുമാണ് ചെയ്തിട്ടുള്ളത്. നാട്ടാനകളുടെ തലപ്പൊക്ക മത്സരത്തിലൂടെ പ്രശസ്തമായ പറവൂർ ചക്കുമരശ്ശേരി മഹാദേവ ക്ഷേത്രത്തിൽ സുപ്രഭാത സൂക്തത്തിന് പകരം കേൾക്കുന്നത് ഇപ്പോൾ ഈ ഗാനമാണ്. അവിടെ നിന്ന് തുടങ്ങിയ ഈ വേറിട്ട രീതി ഇപ്പോൾ നിരവധി ആരാധനാലയങ്ങളിലേക്ക് വ്യാപിച്ചു. കൃത്യസമയത്ത് ഉച്ചഭാഷിണിയിലൂടെ ഗാന രൂപത്തിൽ ഈ സന്ദേശമെത്തുമ്പോൾ ഒരു ഗ്രാമത്തിലേക്കാണ് ഒരേസമയത്ത് ഈ സന്ദേശമെത്തുന്നത്. ലക്ഷക്കണക്കിന് പേരിലേക്ക് ബോധവത്കരണ പ്രവർത്തനം യാതൊരു ചെലവും ഇല്ലാതെ പ്രചരിപ്പിക്കാൻ കഴിയുന്ന തരത്തിലാണ് ഗാനം ചിട്ടപ്പെടുത്തിയിട്ടുള്ളത്. ജില്ലാ പഞ്ചായത്ത് ഡെപ്യൂട്ടി ഡയറക്ടർ ഓഫീസിൽ നിന്ന് ആവശ്യപ്പെട്ടതനുസരിച്ചാണ് പി.കെ സുജൻ വേറിട്ട ആശയം അവതരിപ്പിച്ചത്. സുജൻ തയ്യാറാക്കിയ ബ്രോഷർ ജില്ലയിൽ മാത്രമല്ല സംസ്ഥാനത്തും പ്രതിരോധ പ്രവർത്തനങ്ങൾക്കായി പ്രയോജനപ്പെടുത്തുന്നുണ്ട്. അറിയപ്പെടുന്ന മൃദംഗ വാദകൻ കൂടിയാണ് സുജൻ പൂപ്പത്തി.
തൊഴിൽ ഇല്ലാതായതോടെ നിരവധി കലാകാരന്മാരാണ് അവരുടെ വേദികളിലൂടെ സന്ദേശം നൽകുന്നത്. കലാരൂപത്തിൽ ആവിഷ്കരിച്ചതിലൂടെ ഈ ബോധവത്കരണ ജാഗ്രതാ സന്ദേശം വേഗത്തിൽ ജനങ്ങളിലേക്കെത്തിക്കാൻ കഴിയുന്നുണ്ട്. അത് ആരാധനാലങ്ങളിലൂടെ ആകുമ്പോൾ പ്രചാരണം കൂടുതൽ വ്യാപിപ്പിക്കാനും കൂടുതൽപേരിലേക്ക് എത്താനും ഇടയാകുന്നുണ്ട്.
പി.കെ സുജൻ.
കൊവിഡ് കാലത്തെ മാനസിക സമ്മര്ദ്ദം:
ജില്ലയില് സൈക്കോ സോഷ്യല് സപ്പോര്ട്ട് ടീം
തൃശൂർ: കൊവിഡ് കാലത്ത് മാനസിക സമ്മർദ്ദം അനുഭവിക്കുന്നവർക്ക് പിന്തുണയേകാൻ ജില്ലയിൽ വിവിധ വകുപ്പുകളുടെ കീഴിൽ പ്രവർത്തിക്കുന്ന കൗൺസിലർമാരുടെ സേവനം ഉറപ്പാക്കും. ആരോഗ്യ വകുപ്പിന്റെ കീഴിൽ എൻ.എച്ച്.എമ്മിന്റെ 29 കൗൺസിലർമാർ ഇതിനായി കൺട്രോൾ റൂമുകളിലും ആശുപത്രികളിലും സി.എഫ്.എൽ.ടി.സികളിലുമായി പ്രവർത്തിച്ചു വരുന്നുണ്ട്. സാമൂഹികനീതി വകുപ്പിന്റെ കീഴിൽ പഞ്ചായത്ത് തലത്തിൽ ജെന്റർ റീഹാബിലിറ്റേഷൻ സെന്ററിൽ പ്രവർത്തിച്ചിരുന്ന 26 കൗൺസിലർമാർ പഞ്ചായത്തുകളിലെ കൊവിഡ് ഹെൽപ്പ് ഡെസ്കുകളുമായി ബന്ധപ്പെട്ട് കൊവിഡ് ബാധിതർക്ക് കൗൺസിലിംഗ് നൽകി വരുന്നു. വകുപ്പിന്റെ കീഴിൽ തന്നെ സ്നേഹിത എന്ന പദ്ധതിയുടെ ഭാഗമായി രണ്ട് കൗൺസിലർമാരുടെ സേവനവും ലഭ്യമാണ്. ഐ.സി.ഡി.എസിനു കീഴിൽ പ്രവർത്തിക്കുന്ന 67 സ്കൂൾ കൗൺസിലർമാരും മാനസികാരോഗ്യ പരിപാടിയുടെ കീഴിൽ സേവനം നൽകി വരുന്നു. സൈക്കോസോഷ്യൽ സപ്പോർട്ടിനായി ജില്ലാതലത്തിൽ 0487 2383155,812901884 എന്നീ നമ്പരുകൾ ഉപയോഗപ്പെടുത്താം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |