ഹരിയാന ഉറപ്പിച്ച് കോൺഗ്രസ്; ജമ്മുകാശ്‌മീരിൽ അണിയറ നീക്കം

ന്യൂഡൽഹി: ഇന്ന് ഫലം വരാനിരിക്കെ,​ എക്‌സിറ്റ് പോൾ പ്രവചനത്തിന്റെ ആത്മവിശ്വാത്തിൽ കോൺഗ്രസ് ക്യാമ്പ് ഹരിയാനയിൽ മന്ത്രിസഭാ ചർച്ചകൾ സജീവമാക്കി. സർവെ ഫലങ്ങൾ തള്ളുന്ന ബി.ജെ.പിയും പ്രതീക്ഷ കൈവിടുന്നില്ല.

അതേസമയം,​ ജമ്മുകാശ്‌മീരിൽ ആർക്കും ഒറ്റയ്‌ക്ക് ഭൂരിപക്ഷം ലഭിച്ചില്ലെങ്കിൽ ഭരണം പിടിക്കാനുള്ള നീക്കവും മുന്നണികൾ ഊർജ്ജിതമാക്കി.

പത്തു വർഷത്തിന് ശേഷം ഹരിയാനയിൽ കോൺഗ്രസ് അധികാരത്തിൽ തിരിച്ചുവരുമെന്നാണ് എക്‌സിറ്റ് പോൾ ഫലങ്ങൾ. കോൺഗ്രസ് ജയിച്ചാൽ,​ അത് രാഹുൽ ഗാന്ധിക്ക് കിട്ടുന്ന ജനപിന്തുണയായി കോൺഗ്രസ് ഉയർത്തിക്കാട്ടും. പ്രത്യേകിച്ച്,​ പാർലമെന്റ് തിരഞ്ഞെടുപ്പിൽ ശക്തമായ തിരിച്ചുവരവ് പാർട്ടി നടത്തി നിൽക്കെ.

ബി.ജെ.പി സർക്കാരിനെതിരായ ഭരണവിരുദ്ധ വികാരം, ജെ.ജെ.പി, ഐ.എൽ.എൻ.ഡി തുടങ്ങിയ ചെറു പാർട്ടികളുടെ വിശ്വാസ്യതയിൽ ഇടിവ് എന്നിവയാണ് കോൺഗ്രസിന് അനുകൂലമാകുന്നത്. ദുഷ്യന്ത് ചൗട്ടാലയുടെ ജെ.ജെ.പിയുടെ വോട്ട് വിഹിതം 2019ലെ 15 ശതമാനത്തിൽ നിന്ന് 1-2 ശതമാനമായി കുറയുമെന്നും അത് തുണയ്ക്കുമെന്നും പാർട്ടി വിശ്വസിക്കുന്നു.

എന്നാൽ ​ ഒ.ബി.സി, ബ്രാഹ്മണർ, സെയ്നി വോട്ട് ബാങ്കുകളിൽ വിള്ളൽ വീഴില്ലെന്ന പ്രതീക്ഷയിലാണ് ബി.ജെ.പി. ജാട്ട് വോട്ടുകളിൽ ചോർച്ച അവർ പ്രതീക്ഷിക്കുന്നു. എല്ലാത്തിനുമുള്ള ഉത്തരം ഇന്നു രാവിലെ ഫലപ്രഖ്യാപനത്തോടെ കിട്ടും.

ജമ്മുകാശ്‌മീരിൽ ഭൂരിപക്ഷമില്ലെങ്കിൽ പി.ഡി.പി അടക്കം പാർട്ടികളെ ഒപ്പംകൂട്ടാൻ കോൺഗ്രസ് - നാഷണൽ കോൺഫറൻസ് സഖ്യം നീക്കം തുടങ്ങി. 'ഇന്ത്യ' മുന്നണി ഘടകകക്ഷിയായ പി.ഡി.പി ഒറ്റയ്‌ക്ക് മത്സരിച്ചെങ്കിലും സർക്കാർ രൂപീകരണത്തിൽ സഹകരിച്ചേക്കും. ജെ.കെ.പി.പി, പാന്തേഴ്സ് പാർട്ടി, അവാമി ഇത്തിഹാദ്, അവാമി നാഷണൽ കോൺഫറൻസ് പാർട്ടി, സ്വതന്ത്രർ തുടങ്ങിയവരെയും സമീപിച്ചേക്കാം.

ഹൂഡയ്ക്ക് സാദ്ധ്യത;

പാരയായി സെൽജ

 പ്രധാന നീക്കങ്ങൾ മുൻമുഖ്യമന്ത്രി ഭൂപീന്ദർ ഹൂഡയെ കേന്ദ്രീകരിച്ച്

 കുമാരി സെൽജ, രൺദീപ് സുർജെവാല എന്നിവർ തലമുറ മാറ്റമാവശ്യപ്പെടുന്നു

 എം.എൽ.എമാരുടെ അഭിപ്രായം പ്രധാനമെന്ന് ഹൂഡ

 സെൽജയെ വശത്താക്കാൻ ബി.ജെ.പി പിന്നാലെ

കാശ്മീരിൽ 5 നോമിനേറ്റഡ്

അംഗങ്ങൾ നിർണായകം

90 അംഗ നിയമസഭയിൽ തിരഞ്ഞെടുക്കപ്പെടുന്ന എം.പിമാരെക്കൂടാതെ ലെഫ്റ്റനന്റ് ഗവർണർക്ക് അഞ്ച് അംഗങ്ങളെ നോമിനേറ്റ് ചെയ്യാം. വോട്ടവകാശമുണ്ട് ഇവർക്ക്. ഇതോടെ അംഗബലം 95 ആകും. സഭയിൽ കേവല ഭൂരിപക്ഷം 48മാകും. ബി.ജെ.പിക്ക് ശരാശരി 30 സീറ്റാണ് പ്രവചിക്കുന്നത്.