ബി.ജെ.പിയിൽ ചേർന്ന നേതാക്കൾ തൃണമൂലിൽ തിരിച്ചെത്തി

അഗർത്തല: തൃണമൂൽ കോൺഗ്രസ് വിട്ട് ബി.ജെ.പിയിൽ ചേർന്ന പശ്ചിമ ബംഗാൾ മുൻ മന്ത്രി റജിബ് ബാനർജിയും ത്രിപുര ബി.ജെ.പി എം.എൽ.എ ആശിഷ് ദാസും വീണ്ടും തൃണമൂലിൽ ചേർന്നു. 2023ലെ ത്രിപുര തിരഞ്ഞെടുപ്പുമായി ബന്ധപ്പെട്ട് അഗർത്തലയിൽ നടന്ന റാലിയിൽ വച്ചാണ് ഇരുവരും അംഗത്വം സ്വീകരിച്ചത്.

ബി.ജെ.പി എന്ന വൈറസിനുള്ള ഏക വാക്സിൻ മമത ബാനർജിയാണെന്ന് തൃണമൂൽ കോൺഗ്രസ് ജനറൽ സെക്രട്ടറിയും മമതയുടെ അനന്തിരവനുമായ അഭിഷേക് ബാനർജി റാലിയ്ക്കിടെ പറഞ്ഞു.

കൊവിഡിന്റെ പശ്ചാത്തലത്തിൽ നേരത്തെ മൂന്ന് തവണ റദ്ദ് ചെയ്ത റാലിയ്ക്ക് ശനിയാഴ്ച വൈകുന്നേരമാണ് കോടതി അനുമതി നൽകിയത്.