മഹാരാഷ്​ട്ര ഏറ്റുമുട്ടൽ : കൊല്ലപ്പെട്ടവരിൽ തലയ്ക്ക്​ അരക്കോടി വിലയുള്ള മാവോയിസ്റ്റും

മുംബയ്: മഹാരാഷ്​ട്രയിലെ ഗഡ്ചിറോളി ജില്ലയിൽ ശനിയാഴ്ച പൊലീസുമായുണ്ടായ ഏറ്റുമുട്ടലിൽ കൊല്ലപ്പെട്ടവരിൽ മാവോയിസ്റ്റ് നേതാവ്​ മിലിന്ദ്​ തെൽതുംബ്ഡേയും. ഭീമ കൊറെഗാവ്​ കേസിലെ പ്രതി കൂടിയായ മിലിന്ദിന്റെ തലയ്ക്ക്​ അരക്കോടി രൂപയാണ്​ വിലയിട്ടിരുന്നത്​.

കൊറെഗാവ് കേസിലെ പ്രതിയും ദളിത് ചിന്തകനുമായ ആനന്ദ് തെൽതുംബ്‌ഡേയുടെ സഹോദരനാണ് മിലിന്ദ്.

മാവോയിസ്റ്റ്​ കേ​ന്ദ്രകമ്മിറ്റി അംഗമായ മിലിന്ദ് നാലു സംസ്ഥാനങ്ങളിൽ പ്രവർത്തിച്ച്​ വരികയായിരുന്നുവെന്ന്​ പൊലീസ്​ പറഞ്ഞു. മഹാരാഷ്​ട്ര, മദ്ധ്യപ്രദേശ്​, ഛത്തീസ്​ഗഢ്​, തെലങ്കാന എന്നിവയായിരുന്നു മിലിന്ദിന്റെ പ്രവർത്തന മണ്ഡലം. ഇയാളുടെ അംഗരക്ഷകരായിരുന്ന പുരുഷനും സ്​ത്രീയും വെടിയേറ്റു മരിച്ചതായി​ പി.ടി.ഐ റിപ്പോർട്ട്​ ചെയ്​തു​.

2019ൽ നിരവധി പൊലീസുകാരുടെ മരണത്തിനിടയാക്കിയ കുർഖേഡ ആക്രമണത്തിന്​ പിന്നിൽ മിലിന്ദാണെന്ന്​ സംശയമുണ്ട്​. ശനിയാഴ്ച നടന്ന ഏറ്റുമുട്ടലിൽ 26 മാവോയിസ്റ്റുകളാണ് കൊല്ലപ്പെട്ടത്​. ഗ്യാരാബട്ടി വനമേഖലയിലെ കൊർച്ചിയിൽ ശനിയാഴ്ച രാവിലെയാണ്​ വെടിവയ്പ്പുണ്ടായത്.

തലയ്ക്ക് 20 ലക്ഷം രൂപ പൊലീസ് വിലയിട്ട ലോകേഷ് മങ്ങു പൊദ്യൻ, 16 ലക്ഷം വിലയിട്ട മഹേഷ് ശിവാജി റാവോജി എന്നിവരും ഏറ്റുമുട്ടലിൽ കൊല്ലപ്പെട്ടിട്ടുണ്ട്​. കസൻസൂർ ദളത്തിന്റെ കമാൻഡറായ സന്നു എന്ന കൊവച്ചിയെ പിടികൂടുന്നവർക്ക്​ എട്ടുലക്ഷം രൂപയാണ്​ പാരിതോഷികം നിശ്ചയിച്ചിരുന്നത്. മിലിന്ദിന്റെ അംഗരക്ഷകനായ ഭഗത്​ സിംഗ് എന്ന തിലക്​ ജേഡിന്‍റെ തലയ്ക്ക്​​ ആറ്​ ലക്ഷം രൂപയാണ്​ വിലയിട്ടത്​. പ്രകാശ്​ എന്ന സാധു ബോഗ, മാവോയിസ്റ്റ് നേതാവ്​ പ്രഭാകറിന്റെ അംഗരക്ഷകൻ ലാച്ചു, നവ്​ലുറാം എന്ന ദിലിപ്​ തുലാവി, ബന്ധു എന്ന ദൽസീ ഗോട്ട, കോസ എന്ന മുസാകി, പ്രമോദ്​ എന്നിവരും ഏറ്റുമുട്ടലിൽ കൊല്ലപ്പെട്ടു.

500 പേരടങ്ങുന്ന സി-60 പൊലീസ് കമാൻഡോ സംഘം അഡിഷണൽ എസ്​.പി. സൗമ്യ മുണ്ടെയുടെ നേതൃത്വത്തിൽ​ പ്രദേശത്ത്​ തിര​ച്ചിൽ നടത്തുന്നതിനിടെയാണ് ഏറ്റമുട്ടലുണ്ടായത്​. നാലു പൊലീസുകാർക്ക്​ ഗുരുതര പരിക്കേറ്റു. ഇവരെ ചികിത്സക്കായി കോപ്​റ്ററിൽ നാഗ്​പൂരിലെത്തിച്ചു.