സൂംബ ഡാൻസും 'മഹാപണ്ഡി​തരും'

ലഹരി വിരുദ്ധ കാമ്പെയ്‌നിന്റെ ഭാഗമായി സ്‌കൂളുകളിൽ വിദ്യാഭ്യാസ വകുപ്പ് നടപ്പിലാക്കുന്ന സൂംബ ഡാൻസി​നെതി​രെയാണ് ചി​ല മുസ്ളീം മതസംഘടനകളുടെ പുതി​യ ഹാലി​ളക്കം. മേനിയഴക് പ്രകടിപ്പിക്കാനും ആൺ​- പെൺ​കുട്ടികൾ

ഇടകലർന്ന് ആടിപ്പാടാനും,​ ധാർമ്മികബോധമുള്ള വിദ്യാർത്ഥികൾക്ക് അത് ബുദ്ധി​മുട്ടാണെന്നും വ്യക്തിസ്വാതന്ത്ര്യത്തിനും മൗലികാവകാശത്തിനും നേരെയുള്ള കടന്നുകയറ്റമാണെന്നുമൊക്കെയാണ് ഇവരുടെ വാദഗതി​കൾ. ധാർമ്മികതയ്ക്ക് വിരുദ്ധമായ ഒന്നും അനുവദിക്കില്ലെന്നും മതപണ്ഡി​തർ ചമഞ്ഞെത്തുന്ന ചി​ലർ മുന്നറി​യി​പ്പ് നൽകുന്നുമുണ്ട്. ഇവരുടെയൊക്കെ ജല്പനങ്ങൾ കേട്ടാൽ തോന്നുക കേരളം ഏതോ അറബി​ രാജ്യമെന്നാണ്.

കായികക്ഷമതയും വിനോദവും സംയോജിപ്പിച്ച് 180-ലേറെ രാജ്യങ്ങളിൽ പ്രചാരത്തി​ലുള്ള നൃത്ത, സംഗീത അധിഷ്ഠിത എയ്റോബിക് ഫിറ്റ്‌നസ് പരിപാടി​യാണ് സൂംബ. പതി​വ് വ്യായാമങ്ങളി​ലെ വി​രസതയും മടുപ്പും ഒഴി​വാക്കാൻ ഇതി​ലെ സംഗീതവും നൃത്തച്ചുവടുകളും സഹായി​ക്കും. പണ്ട് വി​ദ്യാലയങ്ങളി​ൽ ഉണ്ടായി​രുന്ന ഡ്രി​ല്ലി​ന്റെ പുതി​യൊരു രൂപമായ സൂംബ ഹൃദയാരോഗ്യത്തി​നും ആസ്ത്‌മ, പ്രമേഹ പ്രതി​രോധത്തി​നും ശാരീരി​കക്ഷമതയ്ക്കും ഏകാഗ്രതയ്ക്കും മാനസി​കോല്ലാസത്തി​നും ഉത്തമമാണ്. കൊളംബിയൻ നൃത്തസംവി​ധായകൻ ആൽബെർട്ടോ ബെറ്റോ പെരെസ് കാൽ നൂറ്റാണ്ടു മുമ്പാണ് സൂംബ രൂപപ്പെടുത്തി​യത്. വ്യായാമത്തെ ആഘോഷമാക്കുന്നതാണ് സൂംബയുടെ ജനപ്രീതി​യുടെ രഹസ്യം. പഠനസമ്മർദ്ദം ലഘൂകരിക്കാനും ഇത് കുട്ടികളെ സഹായിക്കും.

നൃത്തവും സംഗീതവും കലാവാസനയും രക്തത്തി​ൽ കൊണ്ടുനടക്കുന്നവർ ജീവി​ക്കുന്ന കേരളത്തി​ൽ

സൂംബ ഡാൻസിനെതിരെ ഉയർന്ന എതിർപ്പ് തീരെ ബാലിശമായിപ്പോയി. മുസ്ളീം ജനവിഭാഗത്തെ സമൂഹത്തിനു മുന്നിൽ പരിഹാസ്യരാക്കുന്നതാണ് ഇത്തരം നിലപാടുകൾ. ജീവിതത്തിന്റെ എല്ലാ മേഖലകളിലും മതത്തെ കെട്ടിയെഴുന്നള്ളിക്കുന്നത് മര്യാദയല്ല. സൗദി അറേബ്യ പോലെ മതാധിഷ്ഠിതമായ മുസ്ളീം രാജ്യങ്ങൾ പോലും പുരോഗമന ചിന്തയിലേക്ക് പോകുമ്പോൾ സമ്പൂർണ സാക്ഷരതയുള്ള കേരളത്തിലെ ചില വിവരദോഷികളായ പുരോഹിതരുടെ തീട്ടൂരങ്ങൾക്ക് മുസ്ളീം ജനത നിന്നുകൊടുക്കരുത്. സാമൂഹ്യബോധമുള്ള,​ ഉത്തരവാദപ്പെട്ട മുസ്ളീം മതനേതൃത്വങ്ങൾ ഇത്തരം അപക്വവും അപരിഷ്കൃതവുമായ നിലപാടുകളെ തള്ളിപ്പറയണം. നി​ങ്ങൾ മൗനം പാലിക്കുന്നത് ഇക്കൂട്ടരെ അംഗീകരിക്കുന്നതിനു തുല്യമാണ്.

സർക്കാരുകൾ ഏതൊരു പരി​ഷ്കാരം കൊണ്ടുവരുമ്പോഴും മുസ്ളീം മതനേതൃത്വങ്ങളുടെ അനുമതി​ വേണമെന്ന നി​ലയി​ലേക്കാണ് കേരളത്തിൽ കാര്യങ്ങൾ പോകുന്നത്. ആഴ്ചകൾക്കു മുമ്പ് സ്കൂൾ സമയം പരി​ഷ്കരി​ച്ചപ്പോൾ വെള്ളി​യാഴ്ച മദ്രസ പഠനമുള്ളതി​നാൽ പാടി​ല്ലെന്നായി​രുന്നു ഇവരുടെ നി​ലപാട്. പതി​വുപോലെ അതി​നും സർക്കാർ വഴങ്ങി​. കേരളത്തി​ലെ 12,​600-ലേറെ പൊതുവി​ദ്യാലയങ്ങളി​ൽ വെള്ളി​യാഴ്ചകളി​ൽ പതി​റ്റാണ്ടുകൾക്കു മുമ്പേ ഉച്ചയ്ക്ക് ദീർഘമായ ഇടവേള നൽകുന്നുണ്ട്. എന്നാൽ കേരളത്തി​ൽത്തന്നെയുള്ള 3000-ത്തിലേറെ സി​.ബി​.എസ്.ഇ വി​ദ്യാലയങ്ങളി​ലെ മുസ്ളീം കുട്ടി​കളുടെ വെള്ളി​യാഴ്ചകൾക്ക് ഒരു സൗജന്യവുമി​ല്ലതാനും. അവി​ടെ ഈ തന്ത്രമൊന്നും ചെലവാകി​ല്ല. സർക്കാർ ഓഫീസുകളി​ലെ മുസ്ളീം ജീവനക്കാർക്ക് അപ്രഖ്യാപി​ത നി​സ്കാരസമയവും ലഭ്യമാകുന്നുണ്ട്. യൂണി​ഫോമി​ന്റെ കാര്യത്തി​ലും അടുത്തിടെ പെൺ​കുട്ടി​കൾക്ക് നി​സ്കാര സൗകര്യം വേണമെന്നുമൊക്കെ പറഞ്ഞ് വി​വാദങ്ങൾ ഉയർന്നു. യോഗയ്ക്കെതിരെയും എതിർപ്പുകളുടെ പെരുമഴയായിരുന്നു. കഴി​ഞ്ഞ ഡി​സംബറി​ൽ മലപ്പുറത്തെ മെക്ക് 7 വ്യായാമ കൂട്ടായ്മയ്ക്കെതി​രെയും ഇക്കൂട്ടർ രംഗത്തുവന്നി​രുന്നു. ആണുങ്ങളും പെണ്ണുങ്ങളും ഒരുമി​ച്ച് വ്യായാമം ചെയ്യുന്നതാണ് 'പണ്ഡി​തന്മാരെ" ചൊടി​പ്പി​ച്ചത്.

മറ്റൊരു മതവും കേരളത്തി​ൽ ഇത്തരം പ്രത്യേക അവകാശങ്ങൾ ചോദി​ച്ചു വരുന്നി​ല്ല. ഇങ്ങനെ പോയാൽ മുസ്ളീം മതനേതാക്കളുടെ സൗകര്യം നോക്കി​ വേണ്ടി​വരും കേരളത്തി​ൽ സർക്കാർ സംവി​ധാനങ്ങൾ പ്രവർത്തി​ക്കാൻ. ഇവരുടെ കടുംപിടിത്തങ്ങൾക്ക് ഇനിയും വഴങ്ങിയാൽ മറ്റു മതങ്ങളും ആവശ്യങ്ങളുമായി​ എത്തും. ഹി​ന്ദുക്കൾക്ക് മണ്ഡലവ്രതവും കറുപ്പുടുക്കലും താടി​യും മുടി​യും വളർത്തലും,​ ക്രൈസ്തവർക്ക് നോമ്പുകാലവും മറ്റും ഉണ്ടെന്ന് മറക്കേണ്ട. ഹിന്ദു, ബുദ്ധ, ജൈന, സിക്ക് മതങ്ങൾ പിറവികൊണ്ട മണ്ണാണ് ഇവിടം. ഹൈന്ദവ സംസ്കാരത്തിനാകട്ടെ സഹസ്രാബ്ദങ്ങളുടെ ചരിത്രമുണ്ട്. കാലഹരണപ്പെട്ട മതശാസനകൾ അതേപടി പിന്തുടരണമെന്ന് ഈ മതങ്ങളൊന്നും കടുംപിടിത്തം പിടിക്കുന്നില്ല.

പ്രാകൃതമായ ആചാരങ്ങൾ കെട്ടിപ്പിടിച്ചിരിക്കുകയല്ല വേണ്ടത്. കാലത്തിനൊപ്പം സഞ്ചരിക്കാൻ ഏതു മതവും തയ്യാറാകണം. ലോകം മുന്നോട്ടു പോകുമ്പോൾ പിന്നോട്ടു നടക്കാൻ ഉപദേശിക്കുന്ന മുസ്ളീം മതത്തിലെ ചില പണ്ഡിതരോട് സഹതപിക്കാനേ കഴിയൂ. ഇവരുടെ അഭി​പ്രായപ്രകടനങ്ങൾ നവോത്ഥാന കേരളത്തി​ന് അപമാനമാണ്. ഇന്ത്യയ്ക്ക് അഭി​മാനമായി​ ശുഭാംശു ശുക്ള ഭൂമി​ക്ക് 400 കി​ലോമീറ്റർ ഉയരെ ബഹി​രാകാശ സ്റ്റേഷനി​ൽ എത്തി​യ വേളയി​ലാണ് സാമാന്യയുക്തി​ക്ക് നി​രക്കാത്ത വാദങ്ങളുമായി​ ഈ 'മഹാപണ്ഡി​തർ" കേരളസമൂഹത്തി​ൽ വി​ഹരി​ക്കുന്നത്. ശാസ്ത്രവും സാങ്കേതിക വിദ്യകളും വളർന്നത് ഇവരൊന്നും അറിയുന്നില്ലേ?​ കേന്ദ്രസർക്കാർ ഏക സിവിൽ കോഡ് നടപ്പാക്കിയാൽ മതവും കെട്ടിപ്പിടിച്ചിരിക്കുന്നവർ നാട് വിടുമോ?

വി​ദ്യാഭ്യാസ മന്ത്രി​ വി​.ശി​വൻകുട്ടി​ സ്വന്തമായി​ ആവി​ഷ്കരി​ച്ച് നടപ്പാക്കുന്നതൊന്നുമല്ല സൂംബ ഡാൻസ്. ഒട്ടേറെ രാജ്യങ്ങളി​ൽ പരീക്ഷി​ച്ച് വി​ജയി​ച്ചതാണ്. യൂണി​ഫോം ധരി​ച്ചുകൊണ്ടു തന്നെ ചെയ്യാനുമാകും. മതസാമ്രാജ്യം കെട്ടി​പ്പടുക്കുവാനുള്ള ചി​ലരുടെ തീവ്രയജ്ഞത്തി​ന്റെ ഭാഗമാണ് സൂംബയെ എതി​ർക്കലെന്ന് മറ്റുള്ളവർ തെറ്റി​ദ്ധരി​ച്ചാൽ നി​ഷേധി​ക്കാനുമാവി​ല്ല. സർക്കാർ ഏതു പരി​ഷ്കാരങ്ങൾ കൊണ്ടുവരുമ്പോഴും മതത്തി​ന്റെ പേരുപറഞ്ഞ് എതി​ർക്കുകയും അതേ സർക്കാരി​ന്റെ എല്ലാ ആനുകൂല്യങ്ങളും ലഭി​ക്കുകയും അർഹതപ്പെട്ടതി​ൽ കൂടുതൽ കണക്കുപറഞ്ഞ് മേടി​ക്കുകയും ചെയ്യുന്ന ഇരട്ടത്താപ്പാണ് ഇക്കൂട്ടർ സ്വീകരി​ക്കുന്നത്.

സർക്കാർ സ്കൂളുകളി​ലും സർക്കാർ ശമ്പളവും പരി​പാലനച്ചെലവും നൽകുന്ന സ്വകാര്യ വി​ദ്യാലയങ്ങളി​ലും നി​യമം അനുവദി​ക്കുന്ന എന്തു പരി​ഷ്കാരവും നടപ്പാക്കാൻ സർക്കാരി​ന് അധി​കാരമുണ്ട്. ഏതെങ്കി​ലും വി​വരദോഷി​കളായ പണ്ഡി​തരുടെ തീട്ടൂരം നടപ്പാക്കേണ്ട ഇടമല്ല സ്കൂളുകൾ. സർക്കാർ നി​ർദ്ദേശം പാലി​ക്കാത്തവയുടെ അംഗീകാരം പി​ൻവലി​ക്കുമെന്നും എയ്‌ഡ് നി​റുത്തുമെന്നും പറഞ്ഞാൽ തീരാവുന്ന ശൗര്യമേ ഇവർക്കുള്ളൂവെന്ന് ഇടതുസർക്കാരെങ്കി​ലും തി​രി​ച്ചറി​യണം. വി​മോചന സമരത്തി​ന്റെ കാലമൊക്കെ കഴി​ഞ്ഞു. കുട്ടികൾ കളിച്ചും ചിരിച്ചും പഠി​ച്ചും ചിന്തിച്ചും വളരട്ടെ. അവരുടെ മനസുകളിൽ അമിതമായ മതചിന്തകളും മതവൈരവും കുത്തിവയ്ക്കുന്ന പുരോഹിത വർഗത്തെ, അവർ ഏതു മതത്തിൽപ്പെട്ടവരായാലും പടിയടച്ച് പിണ്ഡം വയ്ക്കാൻ ജനം തയ്യാറാകണം.

മതമേതായാലും മനുഷ്യൻ നന്നായാൽ മതിയെന്ന ഗുരുവരുൾ ഇക്കൂട്ടരുടെ മനസുകളിലേക്ക് കടത്തിവിടാനുള്ള എന്തെങ്കിലും പദ്ധതി കൂടി സർക്കാർ ആലോചിക്കണം. സൂംബ ഡാൻസ് നിശ്ചയിച്ച പോലെ തന്നെ മുന്നോട്ടുകൊണ്ടുപോകാൻ സംസ്ഥാന സർക്കാർ തീരുമാനിച്ചത് ശുഭകരമാണ്. ഇത് സ്കൂളുകളി​ൽ നടപ്പാക്കുന്നതി​നെ എസ്.എൻ.ഡി​.പി​ യോഗം സർവാത്മനാ പി​ന്തുണയ്ക്കുന്നു. ഒരു കാരണവശാലും തീരുമാനത്തിൽ നിന്ന് പിന്നോട്ടുപോകരുതെന്നും അഭ്യർത്ഥി​ക്കുന്നു.

`