പ്രവചനങ്ങൾ തെറ്റിച്ച സാമ്പത്തിക വളർച്ച

റിസർവ് ബാങ്കിന്റെ അനുമാനവും മറികടന്ന് രണ്ടാം പാദത്തിൽ ഇന്ത്യ 8.2 ശതമാനം സാമ്പത്തിക വളർച്ച (ജി.ഡി.പി)​ കൈവരിച്ചിരിക്കുന്നത് വലിയ നേട്ടമായി വിലയിരുത്തപ്പെടേണ്ടതാണ്. കഴിഞ്ഞ ആറ് പാദങ്ങൾക്കിടയിലെ ഏറ്റവും ഉയർന്ന സാമ്പത്തിക വളർച്ചാ നിരക്കാണിത്. റിസർവ് ബാങ്കിന്റെ അനുമാനം വെറും ഏഴ് ശതമാനമായിരുന്നു. മറ്റ് സാമ്പത്തിക ഏജൻസികളും ഏഴു മുതൽ 7.5 ശതമാനം വരെ മാത്രമാണ് പ്രവചിച്ചിരുന്നത്. യു.എസ് തീരുവയുടെ ആഘാതം മൂലം രണ്ടാം പാദത്തിൽ വളർച്ചാനിരക്ക് കുറഞ്ഞേക്കുമെന്ന സാമ്പത്തിക വിദഗ്ദ്ധരുടെ പ്രവചനങ്ങൾ തെറ്റായിരുന്നുവെന്ന് തെളിയിച്ച വളർച്ചയാണ് രാജ്യം നേടിയിരിക്കുന്നത്. ആദ്യ പാദത്തിലെ 7.8 ശതമാനത്തിൽ നിന്നാണ് രണ്ടാം പാദത്തിൽ 8.2 ശതമാനമായി വളർച്ചാനിരക്ക് ഉയർന്നിരിക്കുന്നത്. ഉത്‌പാദനം, നിർമ്മാണം, സേവനം എന്നീ മേഖലയിലെ കുതിപ്പാണ് ഉയർന്ന സാമ്പത്തിക വളർച്ച നേടാൻ ഇടയാക്കിയത്.

ഉത‌്‌പാദന മേഖലയിൽ 9.1 ശതമാനവും,​ നിർമ്മാണ മേഖലയിൽ 7.2 ശതമാനവും സേവന മേഖലയിൽ 10.2 ശതമാനവും വളർച്ച നേടിയതായി നാഷണൽ സ്റ്റാറ്റിസ്റ്റിക്കൽ ഓഫീസിന്റെ കണക്കുകൾ ചൂണ്ടിക്കാട്ടുന്നു. ഇന്ത്യയിൽ നിന്നുള്ള ഉത്‌പന്നങ്ങൾക്ക് അമേരിക്ക ചുമത്തിയ 50 ശതമാനം തീരുവ വളർച്ചയെ ബാധിച്ചില്ലെന്ന് വ്യക്തമാക്കുന്നതാണ് പുതിയ കണക്കുകൾ. ലോകം മുഴുവൻ വളർച്ചയുടെ കാര്യത്തിൽ മന്ദീഭവിച്ചുനിൽക്കുമ്പോഴാണ് ഇന്ത്യ ഏറ്റവും വേഗത്തിൽ വളരുന്ന സമ്പദ് വ്യവസ്ഥയായി മാറുന്നതെന്നത് വളരെ ശ്രദ്ധേയമാണ്. നടപ്പു സാമ്പത്തികവർഷം ആദ്യ ആറു മാസക്കാലത്ത് ഇന്ത്യയുടെ ജി.ഡി.പി മുൻ വർഷത്തെ 89.35 ലക്ഷം കോടി രൂപയിൽ നിന്ന് 96.52 ലക്ഷം കോടിയായാണ് ഉയർന്നത്. കാർഷിക ഉത്‌പാദനത്തിലെ കുറവുപോലും ഇന്ത്യയുടെ സാമ്പത്തിക വളർച്ചയ്ക്ക് തടസമായില്ല.

ജി.എസ്.ടി നിരക്ക് കുറച്ച പരിഷ്‌കാരം ഫാക്ടറി ഉത്‌പാദനത്തിൽ കുതിപ്പുണ്ടാക്കിയതാണ് പ്രതീക്ഷയ്ക്ക് അപ്പുറമുള്ള വളർച്ച സാദ്ധ്യമാക്കിയത്. 2024 - 25 രണ്ടാം പാദത്തിൽ ഉത്‌പാദന വളർച്ച 2.2 ശതമാനമായിരുന്നത് ഇക്കുറി 9.1 ശതമാനമായാണ് വർദ്ധിച്ചത്. കാലാവസ്ഥാ വ്യതിയാനം ഉൾപ്പെടെയുള്ള കാരണങ്ങളാൽ കാർഷിക ഉത്‌പാദനത്തിന് തിരിച്ചടി സംഭവിച്ചില്ലായിരുന്നെങ്കിൽ ഇന്ത്യയുടെ സാമ്പത്തിക വളർച്ച രണ്ടാം പാദത്തിൽ വലിയ റെക്കാഡ് സൃഷ്ടിക്കുമായിരുന്നു. വൻകിട രാജ്യങ്ങളുടെ തീരുവ ഉൾപ്പെടെയുള്ള സാമ്പത്തിക തീരുമാനങ്ങൾ ഉലയ്ക്കുന്നത് പലപ്പോഴും സ്വന്തമായി ശക്തമായ സാമ്പത്തിക അടിത്തറ ഇല്ലാത്ത രാജ്യങ്ങളെയാണ്. ഒരുകാലത്ത് ഇന്ത്യയുടെ അവസ്ഥയും അങ്ങനെയായിരുന്നു. എന്നാൽ ഇന്ത്യ ഇന്ന് അതിവേഗം വളരുന്ന ശക്തമായ സാമ്പത്തിക അടിത്തറയുള്ള രാജ്യമായി പരിണമിക്കുന്നു എന്ന് സംശയാതീതമായി തെളിയിക്കുന്നതാണ് പുതിയ വളർച്ചാ നിരക്കുകൾ നൽകുന്ന സൂചനകൾ.

പ്രധാനമന്ത്രി നരേന്ദ്ര‌മോദി പ്രഖ്യാപിച്ച 'ആത്‌മനിർഭർ ഭാരത്" പദ്ധതി ഇന്ത്യയുടെ വളർച്ച ത്വരിതപ്പെടുത്തുന്നതിൽ നിർണായകവും സുപ്രധാനവുമായ പങ്കാണ് നിർവഹിച്ചുവരുന്നത്. ഏത് ഉത്പന്നത്തിനായാലും മറ്റു മേഖലകളിലെ സേവനങ്ങൾക്കായാലും ഒരിക്കൽ നികുതി കൂട്ടിയാൽ ഒരിക്കലും കുറയ്ക്കാത്ത ഒരു സാമ്പത്തിക നയമാണ് സ്വാതന്ത്ര്യ‌‌ത്തിനു ശേഷമുള്ള മുക്കാൽ നൂറ്റാണ്ടായി ഇന്ത്യ തുടർന്നു വന്നിരുന്നത്. നികുതിയിലൂടെ വരുമാനം കൂട്ടുന്നതിനപ്പുറം ഉത്‌പാദനം വർദ്ധിപ്പിച്ച് വരുമാനം വർദ്ധിപ്പിക്കുക എന്ന പുതിയ സാമ്പത്തിക നയത്തിന്റെ പാതയാണ് ഇന്ത്യ ഇപ്പോൾ സ്വീകരിച്ചിരിക്കുന്നത്. ഇതിന്റെ ഭാഗമായാണ് ജി.എസ്.ടി നിരക്കുകളിൽ വലിയ കുറവ് വരുത്തിയ വിപ്ളവകരമായ തീരുമാനം. രാജ്യം ഉയർന്ന വളർച്ച രേഖപ്പെടുത്തിയ സാഹചര്യത്തിൽ അടുത്ത ആഴ്ച ചേരുന്ന റിസർവ് ബാങ്ക് പണനയ സമിതി യോഗം പലിശ വീണ്ടും കുറയ്ക്കാനുള്ള സാദ്ധ്യതയും തള്ളിക്കളയാനാവില്ല. അങ്ങനെ വന്നാൽ നിർമ്മാണ രംഗത്ത് വളർച്ചയുടെ വൻ കുതിപ്പ് ഉണ്ടാകുമെന്നും പ്രതീക്ഷിക്കാം.