പ്രവചനങ്ങളുടെ പ്രകൃതിപുരുഷൻ

പശ്ചിമഘട്ടത്തിന്റെ പരിസ്ഥിതി ഭൂമികയിൽ നിന്ന് പ്രവചനങ്ങളുടെ 'ദൈവവിധി" നിരന്തരം പുറപ്പെടുവിച്ചിരുന്ന ആഴമുള്ളൊരു മുഴക്കമാണ്,​ ഡോ. മാധവ് ഗാഡ്ഗിൽ എന്ന മനുഷ്യന്റെ വിയോഗത്തോടെ മാ‍ഞ്ഞുപോകുന്നത്; ഒപ്പം,​ ആഗോള പരിസ്ഥിതി ശാസ്ത്രത്തിന്റെ ആകാശത്തുനിന്ന് ഒരു മേഘജ്യോതിസിന്റെ വിടവാങ്ങലും. മലകളെയും വനങ്ങളെയും പുഴകളെയും മനുഷ്യനിൽ നിന്നു വേർതിരിച്ച്,​ പ്രകൃതിയെന്നു പേരിട്ട് മാറ്റിനിറുത്തിയിരുന്ന അപകടകരമായ മൗഢ്യത്തിനു നേർക്കാണ്,​ 'പ്രകൃതിയെന്നത് ജീവരാശിയുടെ നിലനില്പിനുള്ള പരിസ്ഥിതി"യാണ് എന്ന സത്യം ഗാഡ്ഗിൽ വിളിച്ചുപറഞ്ഞതും,​ 'അരുത്, അരുത്" എന്ന് വെട്ടിനിരത്തലിന്റെ മഴുത്തലപ്പുകളോട് നിരന്തരം കലഹിച്ചതും. വികസന വിരോധിയെന്ന ആക്ഷേപങ്ങളെ പുഞ്ചിരിയോടെ നേരിട്ടപ്പോഴെല്ലാം ഈ മനുഷ്യൻ ഒന്നുമാത്രം പറഞ്ഞു: 'പരിസ്ഥിതിയെക്കൂടി ഉൾക്കൊണ്ടുള്ള വികസനം ചിന്തിക്കുക!" അങ്ങനെയല്ലാതെ മാത്രം ചിന്തിച്ചുകൂട്ടുകയും,​ പ്രവർത്തിക്കുകയും ചെയ്തതിന്റെ ദുരന്തങ്ങൾ അതിവർഷമായും പ്രളയമായും ഉരുൾപൊട്ടലായും അവതരിച്ചപ്പോഴും ഗാഡ്ഗിൽ അതുതന്നെ പറഞ്ഞു.

പശ്ചിമഘട്ടത്തിന്റെ ജൈവനാശം പഠിക്കുന്നതിനായി കേന്ദ്രം വനം- പരിസ്ഥിതി മന്ത്രാലയം 2010-ൽ നിയോഗിച്ച ഉന്നതസമിതിയുടെ അദ്ധ്യക്ഷനായിരുന്ന ഡോ. മാധവ് ഗാഡ്ഗിൽ പിറ്റേവർഷം സമർപ്പിച്ച റിപ്പോർട്ടിനെ തുടർന്നാണ് ആ പേര് കേരളം ശ്രദ്ധിച്ചുതുടങ്ങിയതെങ്കിലും,​ അതിനു മുമ്പ് നാല് ദശകങ്ങളോളം അദ്ദേഹം രാജ്യത്തെ പ്രമുഖമായ രണ്ട് ശാസ്ത്ര ഗവേഷണ കേന്ദ്രങ്ങളിൽ മനുഷ്യക്രിയ കാരണം പരിസ്ഥിതിക്ക് സംഭവിക്കുന്ന നാശത്തിന്റെ അഗാധഗണിതങ്ങളെക്കുറിച്ച് പഠിക്കുകയും,​ പ്രകൃതിയിൽ നിന്ന് പിണങ്ങിമാറുന്ന

മനുഷ്യന്റെ ദുർവിധികളുടെ പ്രവചനം എഴുതുകയുമായിരുന്നു. ജീവശാസ്ത്രത്തിൽ ബിരുദവും,​ ജന്തുശാസ്ത്രത്തിൽ ബിരുദാനന്തര ബിരുദവുമായി ഹാർവാർഡ് സർവകലാശാലയിലേക്ക് ഗവേഷണത്തിനു ചെന്ന മാധവ് ഗാഡ്ഗിലിന്റെ പഠനവിഷയം മാത്രമല്ല,​ പ്രകൃതിവീക്ഷണം തന്നെ വഴിതിരിച്ചുവിട്ടത് മഹാനായ പരിസ്ഥിതി ശാസ്ത്രജ്ഞൻ ഇ.ഒ. വിൽസണിന്റെ പ്രവചന സ്വഭാവമുള്ള ക്ളാസുകളാണ്. പിന്നീട്,​ വിൽസണിന്റെ പ്രിയശിഷ്യൻ വില്യം ബോസർട്ടിനു കീഴിൽ,​ നമുക്ക് ഇപ്പോഴും അത്ര പരിചിതമല്ലാത്ത 'മാത്തമറ്റിക്കൽ ഇക്കോളജി" എന്ന വിഷയത്തിലായി ഗാഡ്ഗിലിന്റെ ഗവേഷണം.

പരിസ്ഥിതിയുമായി ബന്ധപ്പെട്ട എല്ലാ ഘടകങ്ങളെയും, ഗണിതമാതൃകകളും സൂത്രവാക്യങ്ങളും ഉപയോഗിച്ച് പഠിക്കുന്ന ആ വിശേഷ പരിസ്ഥിതിശാസ്ത്ര ശാഖയിൽ പകരക്കാരനില്ലാത്ത ശിരസായി ഡോ. മാധവ് ഗാഡ്ഗിൽ മാറുകയും ചെയ്തു. പശ്ചിമഘട്ടത്തിന്റെ 64 ശതമാനം ഭൂമിയെയും സെൻസിറ്റീവ് മേഖലയായി വിലയിരുത്തുകയും,​ അതിനെ മൂന്നായി തിരിച്ച് പ്രത്യേകം പ്രത്യേകം നിരോധനങ്ങളും നിയന്ത്റണങ്ങളും ഏർപ്പെടുത്തുകയും ചെയ്ത ഗാഡ്ഗിൽ റിപ്പോർട്ട് വിവാദവിഷയവും പ്രതിഷേധവിഷയവും ആയിത്തീർന്നത് തികച്ചും സ്വാഭാവികം. രൂക്ഷമായ എതിർപ്പുകളെ തുടർന്ന്,​ ആ റിപ്പോർട്ട് വിലയിരുത്താൻ കേന്ദ്ര സർക്കാർ പിന്നീട് നിയോഗിച്ച ഡോ. കസ്തൂരിരംഗന്റെ,​ 'ലഘൂകരിക്കപ്പെട്ട നിയന്ത്രണങ്ങളോടെ"യുള്ള റിപ്പോർട്ടിലെ നിർദ്ദേശങ്ങൾ പോലും നമ്മൾ പൂർണമായും നടപ്പാക്കിയിട്ടില്ല! കുടിയേറ്രവും കയ്യേറ്റവും മാത്രമല്ല,​ മലനിരകളിലെ ഖനനവും തീവ്രനിർമ്മിതികളും പോലും 'സെൻസിറ്റീവ്" ആയ രാഷ്ട്രീയവിഷയം കൂടിയായതിനാൽ പരിസ്ഥിതിപരമായ ആത്മഹത്യയ്ക്ക് നമ്മൾ തീരുമാനിക്കുകയായിരുന്നു എന്നതാണ് യാഥാർത്ഥ്യം.

ക‍ർഷക വിരുദ്ധനോ വികസന വിരുദ്ധനോ അല്ലാതിരുന്നിട്ടും,​ പരിസ്ഥിതിയെക്കുറിച്ച് പറഞ്ഞതു മുഴുവൻ തെറ്റാത്ത പ്രവചനങ്ങളായിരുന്നിട്ടും ഈ മനുഷ്യനെ കേൾക്കാതിരുന്നതിന്റെ ശിക്ഷ പ്രകൃതിദുരന്തങ്ങളായി നമ്മൾ ഇനിയും അനുഭവിക്കാനിരിക്കുന്നതേയുള്ളൂ. പ്രകൃതിവിഭവങ്ങളെ നീതിയുക്തമായി മാത്രം വിനിയോഗിക്കണമെന്നും,​ പരിസ്ഥിതിയിൽ നിന്നു വേറിട്ട് ജീവരാശിക്ക് നിലനില്പ് അസാദ്ധ്യമെന്നും ഇയാൾ പറഞ്ഞതിന്റെ പൊരുൾ തിരിച്ചറിഞ്ഞുതുടങ്ങുമ്പോഴേക്കും നമ്മൾ ഒരുപക്ഷേ വൈകിപ്പോകുമായിരിക്കാം! പദ്മശ്രീയും പദ്മഭൂഷണും ഉൾപ്പെടെ രാജ്യം,​ പുരസ്കാരങ്ങളുടെ പ്രൗഢികൾ അണിയിച്ചപ്പോൾ ഡോ. മാധവ് ഗാഡ്ഗിലിന്റെ മനസിൽ ഒരു 'വേദനാവാക്യ"മായിരുന്നു- 'എന്റെ ആശയങ്ങളും ആശങ്കകളും നിങ്ങൾ തിരിച്ചറിയുകയും ഉൾക്കൊള്ളുകയും ചെയ്യുന്നുവെങ്കിൽ,​ അതാണ് എനിക്കുള്ള വിലയേറിയ ബഹുമതി!" പ്രവചനങ്ങളുടെ പ്രകൃതിപുരുഷന് പ്രണാമം.