സ്‌കൂൾ പച്ചക്കറിത്തോട്ടം പരിപാലനം ഉറപ്പാക്കണം

കേരളത്തിലെ എല്ലാ സ്‌കൂളുകളിലും പച്ചക്കറിത്തോട്ടം അനുവദിക്കണമെന്നാവശ്യപ്പെട്ട് അനുകൂല ഉത്തരവ് നേടിയെടുത്ത അദ്ധ്യാപകനാണ് ഈ കത്തെഴുതുന്നത്. സ്‌കൂൾ ഉച്ചഭക്ഷണത്തിൽ നിന്നും വിഷം തീണ്ടിയ പച്ചക്കറി ഒഴിവാക്കുകയും കുട്ടികളിൽ കാർഷികാഭിരുചി വളർത്തുകയുമായിരുന്നു ഇതിന്റെ ലക്ഷ്യം. എന്നാൽ പച്ചക്കറിത്തോട്ട പരിപാലനം ഭൂരിഭാഗം സ്‌കൂളുകളിലും വഴിപാട് പോലെയാണ്. ഇതിനായി അനുവദിക്കുന്ന തുക കാര്യക്ഷമമായി വിനിയോഗിക്കുന്നില്ല. പച്ചക്കറിത്തോട്ടങ്ങൾ വളർത്തുന്ന സ്കൂളുകളിലാകട്ടെ വേണ്ടവിധത്തിൽ പരിപാലിക്കപ്പെടുന്നുമില്ല. മാത്രമല്ല അവധി ദിവസങ്ങളിൽ പച്ചക്കറിത്തോട്ടങ്ങളുടെ പരിപാലനം ഉറപ്പാക്കാൻ വേനലവധി ആരംഭിക്കുന്നതിന് മുൻപേ വിദ്യാഭ്യാസവകുപ്പ് പരിഹാര നിർദേശങ്ങളടങ്ങിയ ഉത്തരവ് പുറപ്പെടുവിച്ചിരുന്നു. സ്‌കൂളിന് സമീപമുള്ള വിദ്യാർത്ഥികളും ക്ലബുകളും അദ്ധ്യാപക - രക്ഷാകർത്താക്കളും കാർഷിക സമിതികളും ചേർന്ന് തോട്ടം പരിപാലിക്കണമെന്നാണ് ഉത്തരവ്. എന്നാൽ ഭൂരിഭാഗം സ്കൂളുകളിലും തോട്ടങ്ങൾ പരിപാലിക്കപ്പെടുന്നില്ല എന്നതാണ് വസ്തുത.

ഈ അവസ്ഥയ്‌ക്ക് പരിഹാരം കാണാൻ പച്ചക്കറിത്തോട്ട പരിപാലനത്തിന് തൊഴിലുറപ്പ് പദ്ധതിയോ കുടുംബശ്രീ സംവിധാനമോ പ്രയോജനപ്പെടുത്തണം.

എൽ. സുഗതൻ

ശൂരനാട്