അരിമ്പൂർ: കൈപ്പിള്ളി വെളുത്തൂർ അകംപാടം കോൾപ്പടവുകളിലേക്ക് വെള്ളം പമ്പ് ചെയ്യുന്ന മോട്ടോർ ഷെഡിലെ 60,000 രൂപ വിലയുള്ള ചെമ്പ് കമ്പികൾ മോഷണം പോയി. ബുധനാഴ്ച്ച രാത്രിയാണ് സംഭവം. കഴിഞ്ഞ ഏതാനും മാസങ്ങൾക്കുള്ളിലായി അരിമ്പൂർ പഞ്ചായത്തിലെ വിളക്കുമാടം, വാര്യംപടവ്, മനക്കൊടി വെളുത്തുർ അകംപാടം, കൊടയാട്ടി പടവ്, എറവ് കൈപ്പിള്ളി അകംപാടം, രജമുട്ട് പടവ് എന്നീ പാടശേഖരങ്ങളിലെ മോട്ടോർ പമ്പ് ഷെഡുകളിൽ നിന്നായി സമാന രീതിയിൽ 14 ലക്ഷം രൂപയുടെ ചെമ്പ് കമ്പി കളവ് പോയിരുന്നു.
അന്തിക്കാട് പൊലീസിൽ ഇത് സംബന്ധിച്ച് നിശ്ചിത സമയങ്ങളിൽ പരാതി നൽകിയിരുന്നുവെങ്കിലും ആവശ്യമായ ജാഗ്രതയോടെ അന്വേഷണം നടത്താൻ അന്തിക്കാട് പൊലീസ് തയ്യാറായില്ലെന്ന് വിളക്കുമാടം പടവ് സെക്രട്ടറി ടി.വി. ഷാജൻ, വെളുത്തൂർ കൈപ്പിള്ളി അകംപാടം സെക്രട്ടറി പി.ആർ. ഷിജു, പ്രസിഡന്റ് കെ. മധുസൂദനൻ, സൂപ്പർവൈസർ കെ. സുരേഷ് എന്നിവർ പറഞ്ഞു. പരാതി കൊടുത്താലും അന്തിക്കാട് പൊലീസിൽ നിന്ന് നീതി ലഭിക്കാത്തതിനാൽ ഇപ്പോൾ നടന്ന മോഷണത്തെക്കുറിച്ചും പടവുകളിൽ മുമ്പേ നടന്ന മോഷണങ്ങളെക്കുറിച്ചും മുഖ്യമന്ത്രിക്ക് പരാതി നൽകുമെന്നും ഇവർ പറഞ്ഞു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |